НАТО бош котиби Женс Столтенберг Қримнинг Россия тарафидан аннексия қилинишига ва Украинадаги инқирозларга қарши норозилигини эълон қилар экан, бироқ НАТО билан Россия ўртасида можаро юзага келиши ва янгидан совуқ уруш бошланиши истагида эмаслигини маълум қилди.
“Россия билан тўқнашишни истамаймиз. Бизнинг ҳаракатларимиз ўртада совуқ уруш чиқаришга қаратилган эмас. Лекин биз Қримнинг аннексия қилинишига ва Украина шарқидаги инқирозларга ўз норозилигимизни билдириб келмоқдамиз. Сиёсий мулоқотлар учун эшикларни очиқ қолдиришимиз, низоларни камайтириш йўлларини топишимиз ва қарама қаршиликларнинг олдига тўсиқ қўйишмиз лозим.”, деди Столтенберг Германиянинг “Die Welt” кундалик газетасига берган интерьвюсида.
Столтенберг Россия-НАТО кенгаши жуда муҳимлигини таъкидлади. Бу кенгаш икки йиллик танаффусдан сўнг биринчи марта 20 апрел куни Брюсселда бўлиб ўтди. Учрашувда Россиянинг НАТОдаги доимий вакили Александр Грушко иштирок этди. Столтенбергга кўра, бугунги кунда Россиядан НАТОга бирор хатар келмаслиги аниқ, бироқ хушёрликни тарк этмаслик лозим.
“Ушбу кенгаш (Россия-НАТО кенгаши) жуда муҳим аҳамиятга эгадир. Чунки агар жимгина ўтираверсак, ҳеч қандай муаммони ҳал қила олмаймиз. Июл ойида Варшавада бўлиб ўтадиган НАТО саммитидан олдин яна бир учрашув бўлиши мумкин. Шу билан бирга, НАТО Россиянинг ўз кучини кўрсатишига қаршилик билдиришга мажбурдир. Шу сабабли шарқда вужудимизни мустаҳкамламоқдамиз. Бугунги кунда НАТОга аъзо давлатларга нисбатан Россия бирор бир хавф туғдиради, деб ҳисобламаймиз. Шундай бўлса-да биз ҳар қандай вазиятга қарши тайёр туришимиз ва бирдам бўлишимиз керак”, дея қўшимча қилди Столтенберг.
Туркистон:
Бу учрашув Россия билан НАТО ўрталаридаги кескинликни таъкидлаб қўйиш учунгина уюштирилганга ўхшайди. Йиғиндан мақсад ўз қўл остидаги мамлакатларни ва ташкилот аъзоларини сезгакроқ бўлишлари кўзда тутилган бўлиши мумкин. Айниқса НАТО учун бу жуда зарур. Чунки у Россиядан кутилаётган хавф хатарларни эълон қилиб, ўз аъзоларини унга бўлган мухтожликларини янада кучлироқ хис қилдириб қўймоқчи бўлаяпти.
