Россия Ташқи ишлар вазирлиги ўзининг веб сайтида тарқатган баёнотида Марказий Осиё давлатлари Россиянинг ташқи сиёсатидаги биринчи ўринда турган устувор масала эканлигини ва хусусан Ўзбекистон давлати алоҳида ўринга эгалигини маълум қилди. Баёнотда айтилишича, 2015 йилда Россия федерацияси ва Марказий Осиё раҳбарлари ўртасида 25 марта ёпиқ эшиклар ортида, 19 марта эса очиқ турда олий даражадаги учрашувлар бўлиб ўтган.
“Россия ва Марказий Осиё давлатлари ўртасидаги муносабатларнинг тоборо ривожланиб бориши халқаро ва минтақавий долзарб масалалар ҳамда стратегик ҳамкорлик тамойилларига барча тарафларнинг боғлиқ қолиш мажбурияти ва иттифоқий ёндашувларни ўз ичига олади. Бу муносабатларда биринчи бўлиб, Иқтисодий ҳамкорлик, икки томонлама ва интеграция доирасида ҳамкорликни мустаҳкамлаш асос қилиб олинади. Бундан ташқари, томонлар Яқин Шарқ, Шимолий Африка ва Афғонистондаги барқарор вазиятни издан чиқарувчи терроризм, экстремизмга қарши кураш майдонларида ҳамкорлик қилишга жиддий эътибор беради”, дейилади Россия Ташқи ишлар вазирлигининг веб сайтида тарқатилган расмий баёнотда.
Баёнотда Россия ва Ўзбекистон ўртасидаги стратегик шерикчилик ва иттифоқчилик муносабатларга алоҳида тўхталади. Икки давлат ўртасидаги энг юқори даражада, жумладан сиёсий мулоқот, минтақавий хавфсизлик, шунингдек иқтисодий ҳамкорликни янада кенгайтириш, маданий ва гуманитар алоқаларни кенгайтириш таъкидланди.
Россия Ташқи ишлар вазирлиги баёнотида Қозоғистон, Қирғизистон, Туркманистон ва Тожикистон билан ҳам стратегик ҳамкорлик муҳимлигига урғу берилди.
26 апрел куни Москвага ташриф буюриб, Россия президенти Владимир Путин билан учрашган Ўзбекистон Республикаси Президенти Ислом Каримов “Россиянинг Ўзбекистондаги манфаатларини” эътироф этган эди.
Туркистон:
Каримов Россига Путиндан Марказий Осиёдаги иштирокини жиддийлаштиришини сўраб борди. Охирги вақтларда Россия Марказий Осиёдаги бир қатор позицияларига бепарво бўлиб келаяпти. Россия Путиннинг жуда катта хатолари ортидан, халқаро сиёсатдаги вазнини йўқотиб бораяпти. Путин эса, ўз режимини сақлаб қолиш мақсади асосида, Россиянинг манфаатларини бир четга суриб қўйди. Навбат Ўрта Осиё мамлакатларига келди.
Каримовни ташвишга солаётган муаммо Ғарб сақофатининг Ўрта Осиё давлатларига шиддат билан кириб келаётганидир. Каримов Ўзбекистонни тўсиб олгани билан, атроф давлатлар, айниқса Қирғизистон ва Қозоғистон уларга эшикларини кенг очиб беришди. Бу эса, умум минтақа учун ўта хавфли ҳолат. Каримов Россиядан АҚШга қарши рақобат кўламини кучайтиришни сўради. Чунки Каримов Ўзбекистонни сиёсий ва маълумот вакуми ҳолатида абадий ушлаб тура олмайди. Шу яқин кунларда унинг устига АҚШ Каримовга қизи орқали босим бера бошлаяпти. Унинг бошига Россиянинг ҳолати тушиб қолиши мумкин. АҚШнинг доимий ҳамкорлари бўлмайди. Унинг доимий ҳамкори манфаат. Каримов буни яхши билади. АҚШ Каримовни Афғонистон масаласида ва Россияни Ўрта Оиёдаги манфаатларини заифлаштиришда итдек ишлатди. Лекин энди АҚШ учун Афғонистон муаммоси ортта қолди. Россия ҳам ҳолдан тойиб бораяпти. Иккиюзламачи Каримов эса, яна Россиянинг қучоғига ташланаяпти.
