Қозоғистонда 20 март куни натижалари олдиндан маълум бўлган муддатидан олдинги парламент сайловлари бўлиб ўтди. Бу сайловларда кутилганидек Қозоғистон президенти Нурсултон Назарбоев бошчилик қиладиган “Нур Отан” партияси мутлақ устинлик билан ғалаба қазонди. Дастлабки сайлов натижалари эълон қилинганидан сўнг Нурсултон Назарбоев “Нур Отан” партияси сайловолди штабидаги тарафдорларига мурожаат қилди.
“Дастлабки маълумотларга кўра, сайловчиларнинг аксарияти “Нур Отан” партиясига ишонч билдирди – бу бутун халқнинг ғалабаси”,- деб айтди Назарбоев.
Назарбоевнинг айтишича, мамлакат аҳолиси шу ишончи билан партия олиб бораётган йўналиш, дастур ва ислоҳотларни яна бир бор қўллаб-қувватлади. Президент сайловларда овоз берган барчага миннатдорчилик билдирди.
Назарбоев бошқа партиялар томонидан айтилган таклифлар етакчи партия томонидан инобатга олинишини таъкидлади.
Дастлабки ҳисобларга кўра, “Нур Отан” 82 фоиз овоз тўплади. Ундан кейинги ўринларда деярли бир хил овоз тўплаган “Ак жўл” партияси ва Коммунистик партия келмоқда: партиялар 7,20 фоиздан овоз тўплашган.