“Озодлик” радиоси қирғиз хизматининг Оқ уйдаги ишончили манбага таяниб хабар қилишича, Қирғизистон ҳукумати қирғиз-ўзбек чегарасига қўшимча куч жўнатди. Маълумотга кўра, 200 чоғли аскар ва ҳарбий техника чегара назоратини кучайтириш учун 20 март куни тонгда жўнатилган.
Ҳозирча бу маълумотни чегара хизмати бошлиғи Раимберди Дуйшонбиев тасдиқлагани йўқ. Унинг сўзларига кўра, аниқланмаган чегара ҳудудида икки ўлканинг иккитадан БТР ва 60 нафар аскарлари турипти. Чегара хизматининг аскарларидан ташқари қўшимча куч жўнатилган эмас.
“АКИpress” нашрининг Қирғизистон қуролли кучларидаги манбаси ҳам 20 март тонгида мамлакат жанубига 200га яқин аскар ва қўшимча ҳарбий техника жўнатилганини тасдиқлади.
Туркистон:
Мустамлакачи давлатларнинг “Бўлиб ташла ва ҳукмронлик қил” тамоилига асосланган худосиз коммунистлар ҳукумати азалдан бир Уммат вакиллари бўлган Туркистон халқларини беш республикага бўлиб, ўртасига сунъий чегаралар тортаётганида узоқни кўзлаган ва улар ўртасида доимий келишмовчилик ва зиддиятларни пайдо қилиш, шу орқали ўз таъсир доирасида ушлаб туриш осон бўлиши учун чегараларни худди шахмат тахтасидаги катаклар каби тортиб чиқишди. Коммунистлар томонидан қўйилган бу тузоқ шу кунга қадар ўз таъсирини кўрсатиб, Марказий Осиёдаги энг заиф бўлган Қирғизистонга босим ўтказиш йўлида фойдаланиб келинмоқда.
18 март куни Жалолобод вилояти Олабуқа туманидаги Кербен йўли 20-километридаги бахсли ҳудудга ўзбек ҳарбийларини кириб келиши ва иккита блок постни ўрнатиб олиши ҳам Ўзбекистон ҳукумати ўзича хал қиладиган иш доирасида бўлмай, сўнгги вақтларда Қирғизистон ҳукуматининг Россиядан узоқлашиб, АҚШ ва Европа давлатлари билан илиқ муносабат юрита бошлаганига ғаши келган Россия томонидан ёки аксинча Россияга яқинлашишига йўл қўймаслик учун АҚШдан бир огоҳлантириш бўлиши мумкин.
Эсингизда бўлса, Қирғизистон ҳукумати 2014 йили “Манас” аэропортидан АҚШ ҳарбий базасини чиқариб юборгунга қадар ёки Евроосиё иқтисодий иттифоқига аъзо бўлишни пайсалга сола бошлаган вақтларда ҳам қирғиз-ўзбек, қирғиз-тожик чегарасида давомли зиддиятлар авж олган эди.
2014 йилда Қирғизистоннинг қўшни давлатлар билан чегарасида содир бўлган жами низолар сони 40 тага етган, буларнинг 32 таси қирғиз-тожик, 5 таси қирғиз-ўзбек, 2 таси қирғиз-қозоқ чегараси, 1 таси қирғиз-хитой чегарасида содир бўлган. 2013 йил мобайнида қирғиз-тожик чегарасида 19 та низо юз берган бўлса, 2014 йилнинг 10 ойи ичида 32 та низо қайд этилган эди.
