РФ Ташқи ишлар вазирлигининг расмий вакили Мария Захарова матбуот брифингида, Қирғизистон Россиянинг Марказий Осиёдаги энг муҳим ва ишочили ҳамкорларидан бири эканлигини айтиб ўтди.
Унинг сўзларига кўра, Москва Бишкек билан турли соҳаларда ҳамкорликни ривожлантириш ва мавжуд алоқаларни мустаҳкамлашдан манфаатдор.
“Мамлакатларимиз ўртасидаги стратегик ҳамкорлик фақат кучайиб бормоқда. Албатта, биз Бишкекнинг бу йўналишдаги саъй-ҳаракатларини юксак баҳолаймиз. Қирғизистон мисолида Марказий Осиё минтақасида ишончили ҳамкорни кўрамиз ва у билан бундан буён ҳам ўзаро манфаатли ҳамкорликни мустаҳкамлашда давом этамиз. Биз пайдо бўладиган масалаларни, агар шундай масала ёки муаммолар пайдо бўладиган бўлса, ўзаро хурмат асосида кўриб чиқилади”, – дея таъкидлаб ўтди Захарова.
Туркистон:
Қирғизистон ҳукуматининг Россияга бўлган ишончи ва ихлоси кундан-кунга сўниб бораётгани аён бўла бошлади. Бунинг дастлабки кўриниши 2015 йил 21 декабр куни Москва шаҳрида бўлиб ўтган КХШТга аъзо давлатлар раҳбарлари йиғилишидан сўнг намоён бўлди. Мазкур йиғилиш вақтида Путин билан юзма-юз суҳбатлашган қайтган Атамбаев 24 декабр куни йил якунлари бўйича ўтказган матбуот анжуманида Россия Қамбарота -1 ва Юқори Норин ГЭС каскадларини бунёд этиш бўйича шартномавий мажбуриятларини бажаришдан бош тортаётганини, шу сабабли ҳам Путинга “Хафа бўлманг, бироқ биз бошқа ҳамкор излашимиз керак”, деб очиғини айтганини маълум қилган эди.
Атамбаевнинг бу баёноти ортидан Қирғизистон ҳукумати 31 декабр куни Қамбарота -1 ва Юқори Норин ГЭС каскадларини қуриш ва эксплуатация қилиш бўйича Россия билан эришилган келишувни бекор қилиш тўғрисида қарор қабул қилди. Бунга Россия ҳозирги иқтисодий ҳолатида йирик лойиҳаларни молиявий жиҳатдан таъминлай олмаслиги асосий сабаб сифатида келтириб ўтилди.
10 февралга келиб эса Қирғизистон 2015 йилнинг 20 августидан бошлаб бир томонлама бекор қилинган ҳукуматлараро ҳамкорлик келишувини қайта тиклаш ҳаракатига тушиб қолди. Шу куни Жогорку Кенеш спикери Асилбек Жээнбеков АҚШнинг Қирғизистондаги фавқулотда ва мухтор элчиси Шейла Гуолт билан учрашди ва ҳукуматлараро келишувни қайта тиклашга келишиб олди.
Табиийки, Қирғизистоннинг бу ҳаракатлари Россия эътиборидан четда қолаётгани йўқ. Россия нафақат Қирғизистонни, балки собиқ шўролар мустамлакаси бўлган Марказий Осиё республикаларини ўз экинзори сифатида кўришга кўникиб қолган. Бу минтақада ўз нуфузи ва таъсирини сақлаб қолиш учун ҳар қандай жирканч ишлар амалга оширишдан ҳам тап тортмайди. Захарованинг бугунги баёноти ҳам шундан дарак бериб турипти.
