Туркия бош вазири Аҳмад Довудўғли икки кунлик иш сафари билан Қозоғистонга келди. Ташриф давомида Довудўғлига Туркиянинг транспорт, кемасозлик ва коммуникация вазири Бинали Йилдирим ҳамроҳлик қилади.
Қозоғистон президенти матбуот хизматининг хабар қилишича, Аҳмад Довудўғли Назарбоев билан савдо, энергетика соҳасида ҳамкорлик ҳамда халқаро ва минтақавий масалаларни муҳокама қилиши кутилмоқда.
Ҳозирда Туркия инвестиция алмашинуви бўйича (2 млрд. доллар) Қозоғистоннинг АҚШ, Жанубий Корея ва Буюк Британиядан кейин тўртинчи ўринда турувчи асосий ҳамкори саналади.
Бундан ташқари, Қозоғистонда 1800га яқин турк компанияси фаолият олиб бормоқда. Қозоғистондаги турк пудратчилари лойиҳаларининг умумий қиймати 17,5 миллиард долларига яқинни ташкил этади.
Сўнг йилларда икки давлат ўртасидаги товар айрибошлаш ҳажми икки баробарга ортиб, 2 миллиарддан 4 миллиард АҚШ долларига етди. “Янги ҳамкорлик” дастурлари доирасида икки давлат бошлиқлари бу кўрсаткични 10 миллиард АҚШ долларига олиб чиқишга келишиб олишган эди.
