Аввалроқ, 31 декабр куни Қирғизистон ҳукумати Қамбарота -1 ва Юқори Норин ГЭС каскадларини қуриш ва эксплуатация қилиш бўйича Россия билан эришилган келишувни бекор қилиш тўғрисида қарор қабул қилган эди.
20 январ куни бўлиб ўтган пленар йиғилишида Жогорку Кенеш ҳам Россия билан Юқори Норин ГЭС каскади ҳамда Қамбарота-1 ГЭСи қурилиши бўйича келишувни бекор қилнишини қўллаб овоз берди.
Чоршанба куни бўлиб ўтган йиғилишда мазкур ГЭСларни қуриш бўйича келишувларни бажарилмай қолишига молиявий-иқтисодий инқироз сабабли Россиянинг имкониятлари чекланиб қолгани айтилди.
Гарчи Москва ГЭсларни қуришдан расман бош тортмаган бўлсада, ГЭСларни қуриш бўйича келишувни ўзгартириш, кредит фоизларини ошириш ва муддатни узайтиришни таклиф қилмоқда. Табиийки, бу таклиф қирғиз ҳукумати учун манфаатли бўлмаганлиги сабабли бу келишувни бузишга қарор қилди.
Россия Қирғизистоннинг бир нечта тармоқларини қўлга олиш орқали уни ўзига тўлиқ қарам қилиб олишни режалаштирган эди. 2014 йил апрел ойида Россиянинг “Газпром” компанияси “Қирғизгаз” 1 доллар эвазига сотиб олган ва беш йил мобайнида Қирғизистондаги газ тармоғига 20 миллиард рубл (ўша вақтдаги курс бўйича 679 миллион доллар) сармоя киритиш мажбуриятини зиммасига олган эди. Бироқ бугунга келиб бу келишув ҳам бажарилмай қолиши мумкинлиги маълум бўлди.
