Туркия ҳаво сарҳадларини бузган Россиянинг су-24 самалёти уриб туширилиши сабабли Россия президенти Владимир Путин Туркияга қарши иқтисодий чора қўллаш ҳақидаги фармонга имзо чекди. Кремл тарафидан чиқарилган баёнотга кўра, фармонга биноан турк моллари учун божхона назорати кучайтирилади. Шунингдек Туркия билан визасиз режим ҳам бекор қилинади.
Бу орада Туркия президенти Ражаб Тоййиб Эрдуғон ҳодиса юзасидан гаплашиб олиш учун Россия президенти Владимир Путинга қўнғироқ қилган, бироқ Путин телефонга жавоб бермаган. Бу ҳақида унинг ўзи Франциянинг 24 каналига билдирди.
Эрдуғон узр сўрашни кескин рад этган бўлса ҳам, бироқ бу воқеадан қаттиқ афсусда эканлигини маълум қилди. Туркиянинг Баликесир шаҳрида ташкил қилинган йиғилишда нутқ сўзлаган Эрдоган Путин билан тил топишишга умид билдирди.
“Бу ҳодиса бизни ғоят қайғуга солди. Мен бу воқеадан жуда ғамга ботдим. Биз бундай бўлишини ҳеч истамасдик. Лекин бўлар иш бўлди. Умид қиламанки, бошқа такрорланмайди. Бу масала ҳақида суриштириб, муаммони ҳал қиламиз. 30 ноябр куни Париж шаҳрида глобал иқлим ўзгаришига бағишланган саммит режалаштирилган. Ўйлайманки, бу Россия билан алоқаларимизни қайта тиклаш учун жаноб Путин билан учрашишга қулай фурсат яратади”, деди Туркия президенти.
Туркия бош вазирининг ноиби Нўъмон Қуртулмиш ҳам Россия ва Туркия ўртасидаги алоқага путур етганидан сўнг яна қайта тикланишига умид бирдирди.
“Қирувчи самалётнинг уриб туширилиши қасддан амалга оширилган эмас. Туркия агар бу самалёт Россияга қарашли эканлигини билганида эди уни уриб туширмаган бўларди”, “Россия билан ўртамизда бир қанча иқтисодий алоқалар мавжуд. Кириш визасини бекор қилиш ҳам иқтисодий алоқалар турига киради. Анқара ва Москва ўртасида ҳиссиётдан келиб чиқиб, баъзи чора тадбирлар кўрилиши мумкин. Лекин умид қиламизки, бу тадбирлар узоқ давом этмайди”, деди Қуртулмиш.
Россия су-24 самалёти уриб туширилиши оқибатида Туркияга қарши уруш эълон қилиши эҳтимолдан узоқ бўлсада, бироқ ўзининг обрўсини сақлаб қолиш учун турли ишларга қўл урмоқда. Рус фуқароларини Туркияга, туркияликларни эса Россияга бемалол сафар қилишдан тийиб қўйиши, Россияда фаолият юритаётган турк ишбилармонларини маҳкамага тортиши шулар жумласидан. Аммо Туркия аввал бошда ҳодиса юзасидан узр сўрашни кескин рад қилиб “агар кимдир узр сўраш керак бўлса, биз эмас, ҳаво сарҳадларимизни бузганлар узр сўрашлари лозим”, деб турган бўлсада, аммо кейинги баёнотларида йиғлагудек бўлиб ялинишга тушди.
