Ўтган сешанба куни Туркия томонидан Россиянинг Су-24 ҳарбий бомбардимончи самолёти уриб туширилиши ортидан шошилинч баёнот берган Россия президенти Владимир Путин бу ишнинг “жиддий оқибатлари” билан ҳам огоҳлантирган эди.
Бундай жиддий оқибатлар ўзини узоқ куттирмади.
Россия самолёти уриб туширилганидан икки кун ўтиб рус ҳарбий самолётлари Туркия чегарасида жойлашган Аъзаз шаҳрида Туркиядан келаётган 20та юк машинасидан иборат инсонпарварлик ёрдами карвонини бомбардимон қилди. Ҳужум натижасида етти киши қурбон бўлиб, 10 киши жиддий яраланган.
Хабарларга кўра, Туркиядан йўлга чиққан карвон Суриядаги қочоқлар лагерига тижорат моллари ва инсонпарварлик ёрдами олиб кетаётган бўлган.
Авиазарбалардан омон қолган хайдовчиларнинг сўзларига кўра, карвон 20та юк машинасидан иборат бўлиб, улар йўл олган қочоқлар лагери Туркия чегарасидан 5 км узоқликдаги Аъзаз шаҳрида жойлашган эди. Сурия қочқинларига мўлжалланган ёрдам Humanitarian Relief Foundation (Гуманитар ёрдам фонди) халқаро хайрия ташкилотининг Туркиядаги штаб-квартираси томонидан ташкиллаштирилган эди.
