Туркия бош штаб бошқармаси Россияга оид қирувчи самолёт Турк ҳаво ҳудудини бузганлиги сабабли уриб туширилганлигини билдирди. Бош штабга кўра, рус самолёти беш дақиқа ичида 10 марта огоҳлантирилган. Талаб бажарилмагач ҳужумга ўтилган. Турк ҳаво ҳудудини бузган рус қирувчи самолёти Туркия тарафидан уриб туширилгандан сўнг Россия президенти Владимир Путин илк бор баёнот бериб Туркияга қарши қаттиқ акс муносабат билдирди.
“Россия самолётининг Сурияда уриб туширилиш ҳодисаси терроризмга қарши кураш доирасидан ташқаридаги ҳодисадир. Орқамиздан пичоқландик”, “Бизнинг авиациямиз ва учувчиларимиз Туркияга асло таҳдид туғдирмаган эди. Бу жуда аниқдир. Самолёт ИШИДга қарши ҳужумларини давом эттираётган эди. У Туркия чегарасидан 4 километр узоқликда эди. Россия бундай ҳодисалар олдини олиш бўйича АҚШ билан шартнома имзолаганлигига қарамай, Туркия Россиянинг самолётини уриб туширди. Самолётнинг уриб туширилиши Туркия-Россия муносабатлари учун жиддий оқибатларга олиб келиши мумкин. Россия Туркияга нафақат қўшни давлат, балки дўст сифатида яқин эди. Бундай қадамнинг кимга фойдаси бор, билмайман. Лекин бизга бунинг кераги йўқ. Туркия Россия самолётини уриб туширгандан кейин зудлик билан Россия билан мулоқот ўрнатиш ўрнига НАТОга мурожаат қилди. Гўё самолётни Россия уриб туширгандек”, деди Путин.
Мазкур Самолёт ҳодисаси отидан Россия Мудофаа вазирлиги Туркия билан барча ҳарбий алоқалар тўхтатиб қўйилганлигини маълум қилди. Бу ҳақида Россия Мудофаа вазирлигининг веб-сайтида Россия Бош Штаб бошқармасига оид асосий операциялар мудирлигининг раҳбари генерал лейтенант Сергей Рудскойнинг баёноти эълон қилинди.
Россия Мудофаа вазирлигининг Su-24 русумли қирувчи самолёти уриб туширилганлиги ҳақида баёноти эълон қилингандан сўнг Туркиянинг Москвадаги элчихонаси олдида норозилик намойиши бўлиб ўтди. Ҳар хил шиорлар билан чиққан намойишчилар элчихона биноси деразаларига тухум ва тошлар отди. Бинонинг 2 ва 3-қаватдаги дераза ойналари синди.
Москва елчихонаси Матбуот маслаҳатчиси Орҳан Газигил елчихона олдида Полиция зарурий хавфсизлик чора-тадбирларини кўрмаганлигини билдирди.
“Элчихона жойлашган кўча тўлиқ ёпиб қўйилиши мумкин эди, лекин полиция бундай қилмади. Охир оқибатда елчихона биноси шикастланди”, деди Газигил.
Мазкур ҳодиса ортидан Россия Ташқи ишлар вазири Сергей Лавровнинг Туркияга режаланган сафари ҳам бекор қилинди. Рейтер хабарига кўра, Россиянинг Сочи шаҳрида журналистларга интервью берган Лавров Туркияда террорчилик хавфи ўтган ой Мисрда портлатилган Россия йўловчи самолётдан кам эмаслигини таъкидлади. Франс-Пресснинг хабарига кўра, Лавров рус фуқароларини Туркияга боришдан огоҳлантирган.
