Хитой ҳукуматининг мусулмонларга нисбатан 66 йилдан буён давом эттириб келаётган зулми уйғур мусулмонларини ҳолдан тойдирди. Шарқий Туркистоннинг Пейзават шаҳрида коммунист Хитой ҳукумати бутун мусулмон аҳолини “Намозга эмас рақсга” номли жамоий фаолиятга иштирок этишга мажбур қилмоқда.
“Бу фаолиятга иштирок этиш ёки этмаслик коммунистик партия билан Аллоҳнинг ўртасидаги танлов ўлчовидир, яъни иккисидан бирини танлашдир”, дея эълон қилинган. Шунга кўра, ким бу фаолиятга иштирок этмаса, коммунистик партияни эмас, Аллоҳни танлаган бўлади ва Хитой ҳукуматининг қаҳрига дучор бўлади. Шу сабабли барча инсонлар, ҳатто қариялар ҳам ҳукумат тазйиғи ва зулмидан қочиб, ўзларининг коммунистик партия тарафдори эканлигини исботлашга ҳаракат қилмоқда. Бунинг учун улар ёшу-қари, эркагу-аёл демай, кенг майдонларда Хитой байроғини кўтариб рақсга тушишга мажбур бўлишмоқда.
Шунингдек, олинган хабарларга кўра, Хитой ҳукумати уйғурларнинг фарзандларига айрим исломий исмлар қўйишни таъқиқлаб қўйди. 22 мусулмон исмидан тузилган рўйхат Хитойда Twitter ижтимоий тармоғи каби қўлланиладиган “Sina Weibo” саҳифасида эълон қилинган.
Таъқиқланган исломий исмлар рўйхатида Бин Лодин, Саддам, Ҳусайн, Арафат, Мужоҳид, Мужоҳидуллоҳ, Асадуллоҳ, Абдулазиз, Сайфуллоҳ, Жундуллоҳ, Сайфуддин, Зикриллоҳ, Насруллоҳ, Шамсиддин, Фахриддин, Амина, Муслима, Мухлиса, Муниса, Ойша, Фотима ва Хадича исмлари санаб ўтилган. Уйғур фаолларининг билдиришича, Шинжонда тақиқланган исломий исмлар сони 22 тадан кўпдир.
