Россия қуролли кучлари Сурияда мужоҳидларга қарши ошкоро жанг қилишни бошлади. Сурия давлат телевиденияси ҳам Россия ҳарбийлари Асад учун жанг олиб бораётганини қайта-қайта эфирга узатмоқда.
Шу ҳафта ичида Россияга оид уч дона ҳарбий карго самалёти Суриянинг Латакия шаҳрига келиб қўнган эди. Россия ташқи ишлар вазири Сергей Лавров Сурияга инсонпарварлик ёрдами билан бир қаторда ҳарбий анжомлар ҳам юборилганлигини билдирди. Лавровга кўра, Суриянинг катта қисмини эгаллаб олган террорчи гуруҳларга (мужоҳидларга) қарши биргаликда жавоб қайтариш алоҳида аҳамиятга молик иш ҳисобланади. Шунинг учун у Сурия масаласида салбий оқибатларга дуч келиб қолмаслик учун Россия ва Америка ҳарбийлари бир бирига ҳамоҳанг равишда ҳаракат олиб боришлари лозимлигини таъкидлади.
Вошингтон Россиянинг Сурияда ҳарбий база ташкил қилиб давлат кучлари билан бирга мухолифларга қарши жанг олиб бориши мумкинлигини айтмоқда. АҚШ давлат котиби Жон Керри россиялик ҳамкасби Сергей Лавров билан икки марта телефон орқали суҳбат ўтказиб, рус аскарлари Сурияда беқарорликни яна-да кучайтириши мумкинлигидан огоҳлантирди. Аммо Оқ уй матбуот котибининг ёрдамчиси Эрик Шульц матбуот анжуманида Россиянинг бу қадамлари ИШИДга қарши бўлса, уни қўллаб қувватлашини билдирди.
