28 август куни Тожикистоннинг Ваҳдат вилоятида ички ишлар ходимлари 23 ёшли Умар Бобожоновни соқоли туфайли қўлга олишиб, бошқармага олиб боришди. Узоқ вақт тергов ўтгазилилгандан сўнг уни қаттиқ дўппослашди. Натижада унинг аъзолари шикастланиб, оғир аҳволда касалхонанинг реанимация (жонлантириш) бўлимига жойлаштирилди. Умар Бобожоновнинг дўстларидан бири Зоҳиржон Соҳибовнинг айтишига қараганда, уларни ҳеч қандай шаклда огоҳлантирмай, ИИБ бошқармасига олиб кетишган.
“Биз Ваҳдат шаҳридаги “Модар (Она)” ҳайкалининг ён-атрофида айланиб юрган эдик. Тўсатдан учта машина келиб тўхтади. Улардан 6-7 киши тушишди, мени ва Умарни ички ишлар бўлимига олиб кетишди. Уни роса дўппослашди. Кейин Умарни оғир аҳволда касалхонага олиб бордик”, дейди Зоҳиржон.
Юзлаган инсонлар Ваҳдат шаҳри марказий касалхонасига тўпланишиб эътироз билдиришди. Умар Бобожонов олган жароҳати туфайли 3 сентябр куни кечаси, ўзига келмай оламдан ўтди.
Исмини ошкор қилмаган шахснинг айтишича, аслида Умар айнан дўппосланган соатнинг ўзида жон берган. Аммо бош врач ички ишлар ходимларининг талабига биноан бу нарса ҳақида хеч кимга айтмаган, ҳатто марҳумнинг яқинларини реанимация хонасига ҳам киритмаган.
Мазкур ҳодиса ортидан, яъни 4 сентябр куни соат 3 чамаси Умар Бобожоновнинг яқинларидан иборат бир гуруҳ қуроланган шахслар яширин ҳолатда шаҳар аэропорт мавзесида жойлашган ҳарбий қисмларнинг бирига киришиб милиция ходимларига ўқ узишди. Натижада 10дан ортик милиция ходимлари вафот этди. Давлат мудофаа вазирининг собиқ ўринбосари Абдуҳалим Назарзода (ҳожи Ҳалим) бу гуруҳга бошчи деб гумон қилинмоқда .
Айни пайтда Ромит дарасида қонли тўқнашувлар давом этмоқда ва қурбонлар сони тобора ортмоқда.
Манба: Озодагон.
