1997 йил Ярашув битимига мувофиқ Қуролли кучлар таркибига киритилган ҳамда мухолифат учун ажратилган 30 фоизли квота асосида республика мудофаа вазирига ўринбосар этиб тайинланган генерал-майор Абдуҳалим Назарзода Ваҳдат шаҳар ички ишлар бўлимига содир этилган ҳужумга раҳбарлик қилган. Вазир ўринбосари Тожикистон Ислом уйғониш партиясининг аъзоси, Тожикистон бирлашган мухолифатининг тарафдори бўлган. Бу маълумотлар 4 сентябрь куни кечқурун Тожикистон ички ишлар вазирлигининг сайтида пайдо бўлган. “Назарзода террорчилик актида фаол қатнашиб, уни бошдан охиригача шахсан ўзи бошқарган”, – дея хабар беради ИИВ матбуот маркази.
Президент фармони билан Абдуҳалим Назарзода “содир этган жиноятлари учун” эгаллаб турган лавозимидан бўшатилган.
ИИВ баёнотида айтилишича, ҳуқуқни муҳофаза қилиш органлари Назарзода бошчилик қилган террорчилик гуруҳи аввалдан ишлаб чиқарилган режага асосан ҳаракат қилганини аниқладилар. Абдуҳалим Назарзода истиқомат қилаётган уйда ва унга қарашли новвойхонада олиб борилган оператив-қидирув тадбири, шунингдек, Ваҳдат тумани Марғоб қишлоғида ҳамда Рудакий тумани Мағмурод қишлоғида террорчилик гуруҳини таъқиб этиш натижасида катта миқдорда қурол-аслаҳа ва ўқ-дори топиб олинган. ИИВ қайд этишича, Абдуҳалим Назарзода террорчилик актларини тайёрлаш жараёнида мудофаа вазири лавозими ваколатларини суистеъмол қилиб, узоқ вақтгача ҳамкасбларини чалғитиб келган.
Ваҳдат ички ишлар бўлимига ҳамда Тожикистон мудофаа вазирлигининг марказий аппаратига 4 сентябрга ўтар тунда содир этилган ҳужум натижасида террорчилар тўрт нафар ИИВ ОМОН жангчисини ҳамда Ваҳдат ИИБ бўлимининг тўрт нафар ходимини ўлдирдилар, дея аниқлик киритади ИИВ матбуот маркази. Шунингдек, ички ишлар бўлимидан катта миқдорда қурол-аслаҳа ва ўқ дори ўғирлаб кетилган. Отишмада ҳужум қилганлардан тўққиз киши ўлдирилди, уларнинг орасида собиқ Бирлашган тожик мухолифати жанггариси ва Тожикистон Ислом уйғониши партиясининг аъзоси Зиёраддин Абдуллоев бор. Баёнотда айтилиишча, жиноий тўданинг етти нафар аъзолари қўлга олинди.
Оператив маълумотларга кўра, Назарзода ҳамда унга эргашган Тожикистон Мудофаа вазирлиги штурмчи-десантчи батальоннинг 135 нафар ҳарбий хизматчиси Душанбедан 45 километр шарқда жойлашган Ромит дарасига ўтиб кетдилар. Айни пайтда уларнинг яширинган жойини аниқлаш ва йўқ қилиш бўйича операция ўтказилмоқда. Душанбе шаҳрида барча ҳукумат муассасаларига, шу жумладан, Президент саройига олиб борувчи асосий йўллар тўсиб қўйилган, дея хабар беради РИА Новости.
Манба: “Фарғона” халқаро ахборот агентлиги.
