АҚШнинг Сурия масаласи бўйича хос вакили Майкл Ратни Сурия инқирозини ҳал қилиш учун Россияга қараб йўл олди. Ратни 2 сентябргача давом этадиган сафарида айнан шу масала бўйича Россиядан сўнг Саудия арабистонига, ундан сўнг эса БМТга мезбонлик қилаётган Женевага боради. У Женевада БМТнинг Сурия масаласи бўйича хос вакили Стеффан Де Мистура билан учрашади.
Россия ташқи ишлар вазирлигининг сўзчиси Мария Захарова Москвага келган АҚШ вакили рус ҳамкасби Михаил Багданов билан учрашиб, Сурия масаласи бўйича муҳокама олиб боришини билдирди. АҚШ ташқи ишлар вазирлигининг сўзчиси Жон Кирби ҳам Сурия масаласи бўйича бир нечта вариантлар кўриб чиқилишини билдирди.
“Тўғри, Сурия масаласини ҳал қилишда қарашларимиз ўзгача. Бироқ умид қиламизки, сиёсий ечимга эришиш учун Россия билан ҳамкорлик қилиш имконияти мавжуд. Биз бунга ишонамиз”, деди Жон Кирби.
Ратни янги мансабини эгаллагандан буён Сурия масаласи бўйича биринчи марта сафар қилмоқда. У қанчалик муваффақиятга эришиш ёки эришмаслиги ҳозирча маълум эмас. Шу вақтгача Сурия масаласини АҚШ ва Ғарб фойдасига ҳал қилиш учун бир қанча мутахассисларнинг кўрсатган жонбозликлари пучга чиқди.
