Кейинги пайтларда Тожикистонда Ислом ва мусулмонларга нисбатан босимлар турли шаклларда ортиб бормоқда. Мамлакат пойтахти Душанбеда марказий масжид атрофидаги диний китоблар ва ҳижобга мосроқ кийим-кечак сотадиган 17 та дўкон ёпиб қўйилди. “Радиои Озоди”нинг хабар қилишича, дўконлар шаҳар мерияси тарафидан чиқарилган хос қарорга биноан ёпиб қўйилган. Бу дўконлар диний буюмлар ва либослар сотилиши билан танилган дўконлар эди.
Мазкур дўконлардан бирида сотувчи бўлиб ишлайдиган Маҳмадулло Росуловнинг “Радиои Озоди”га билдиришича, дўконлар махсус комиссия тарафидан ўтказилган тадбир (рейд) натижасида ёпиб ташланган.
“Уч кун аввал дўконларимизни ёпиб қўйишди. Ҳозирда биз ҳомият тарафидан чиқариладиган қарорни кутиб турипмиз. Чунки ҳокимиятнинг рухсати бўлмай туриб қайта иш бошлай олмаймиз”, дейди дўкон сотувчиси.
Душанбе шаҳар ҳокимиятининг вакиллари эса ўтказилган тадбирдан кўзланган мақсад дўконларни ёпиб қўйиш эмас, балки сотувга қўйилган маҳсулотларнинг турларини тартибга келтириш эканлигини даъво қилишмоқда.
“Бу дўконларда бизнинг маданиятимизга бегона бўлган кийимлар сотилмоқда. Бу иш шаҳар ҳокимияти тарафидан кўриб чиқилади. Уларнинг нима сотишлиги ёки нима сотмаслиги ҳукумат қарорига боғлиқдир”, деди ҳукумат вакилларидан бири.
19 август куни Душанбе ҳокими Махмадсаид Убайдуллоев тожикларнинг миллий маданиятига мос келмаган кийимлар борасида бир йиғилиш ташкил қилган эди. Йиғилишда Убайдуллоев баъзи масъулларнинг бу борада етарли даражада ҳаракат қилмаётганлигини танқид қилиб, миллий маданиятига мос келмаган кийимларни импорт қилиш ва сотишнинг олди олинишини талаб қилган эди.
