Инжирлик ҳаво базаси келишуви ортидан АҚШ президенти Барак Обама билан учрашмоқчи бўлган Туркия президенти Ражаб Тоййиб Эрдуғон “Ҳозир эмас, кейинроқ кўришамиз”, деган жавобни олди. Эрдуғон сентябр ойида Нью-Йоркда ташкил қилинадиган БМТ бош ассамблеясида ёки шу ойнинг ўзидаёқ, Барак Обама билан учрашув ўтказиш истагини билдирган эди. Бироқ Оқ уй “Президентнинг ишлари роса кўп. Ҳозир эмас, ноябр ойида Анталяда ўтказиладиган G-20 давлатларининг учрашуви чоғида кўришамиз”, дея Эрдуғоннинг истагини рад этди. Туркия президенти идорасига қарашли манбадан олинган хабарга кўра, Эрдуғон ҳам келаси ой Нью-Йоркда ташкил қилинадиган БМТ бош ассамблеясига иштирок этишдан воз кечган. Унинг ўрнига Туркиядан вакил сифатида бош вазир Аҳмад Довутўғли иштирок этади. Эрдуғон-Обама учрашуви 15-16 ноябрда Анталяда ташкил қилинадиган G-20 давлатларининг учрашувида маълум бўлади.
Туркия президенти шу ойнинг бошларида Индонезия ва Покистон сафаридан қайтаётиб, “Ҳануз бир қарорга келмадик. Агар БМТ бош ассамблеясига иштирок этадиган бўлсам сентябр ойида, агар иштирок этмайдиган бўлсам шу ойнинг ўзида АҚШга сафар қилишим мумкин”, деган эди. Эрдуғон АҚШга қиладиган сафарида илк бор АҚШнинг Мэриленд штатида қурилган масжидни очиб бериши айтилган эди. Бироқ Эрдуғоннинг бу истаги Вошингтон тарафидан маъқул кўрилмади.
Оқ уйдан келган хабарга кўра, Вошингтон Эрдуғоннинг Мэриленддаги масжиднинг очиб беришига қарши эмас. Турк раҳбари истаган пайтида келиб масжиднинг очилиш маросимига иштирок этиши мумкин. Бироқ президентнинг ишлари кўп. Эрдуғон билан учрашиб ўтиришга вақти йўқ. Сентябр ойидаги БМТ бош ассамблеясига мезбон сифатида ишлар яна ортади.
Туркия президенти ўтган йилда ташкил қилинган БМТ бош ассамблеясида ҳам Обаманинг “иши кўп”лиги учун у билан “учрашиш бахти”га муяссар бўла олмаган эди.
