Туркия пойтахти Анқарада кетма-кет олти марта бўлиб ўтган хавфсизлик йиғилиши ортидан президент Ражаб Тоййиб Эрдоган ва бош вазир Аҳмад Довутўғли Сурия чегараларида ҳарбий тайёргарликни бошлаш учун буйруқ берди. Бу хабарни “Адолат ва Тараққиёт” партиясига яқинлиги билан танилган “Yeni şafak” газетаси тарқатди.
Довутўғли мазкур буйруқни давлат бош штаб бошқармасининг раҳбари Нежбет Ўзелга ёзма равишда топширди. Бош вазирнинг ёзма буйруғига қарамай, ҳарбийларда бироз ортга чекиниш борлиги айтилмоқда.
Ишончли манбалардан олинган хабарларга кўра, Туркия қуролли кучлари чегара бўйлаб ҳарбий амалиётни бошлаш учун ҳукуматдан ёзма равишда кўрсатма талаб қилган. Бироқ бу талаб қуролли кучларнинг ҳукумат қарорига қарши эканлигини билдирмайди. Мақсад турк аскарларининг Сурияга кириши борасида халқаро ҳамжамият олдида оқловга эга бўлишдир. Бош штабнинг маълум қилишича, Сурия шимолида жойлашган “Маре” чизиғини хавфсиз ҳолга келтирилиши учун ҳарбий амалиёт бошлаш халқаро ҳуқуқ жиҳатидан муаммо туғдиради.
Ҳукумат бунинг олдини олиш учун тайёргарлик кўра бошлаган. Туркия ташқи ишлар вазирлиги мазкур амалиёт зарур эканлигини дунёга уқтириш учун дипломатик ҳужумларни бошлаши кутилмоқда. Биринчи ўринда АҚШ, Сурия ва Эрон билан музокара ўтказилади.
Туркия қуролли кучлари Сурияга бир вақтнинг ўзида икки нуқтадан, “Karkamış” ва “Öncüpınar”дан кириши кутилмоқда. Чегарада хавфсиз минтақани вужудга келтириш учун 18 минг турк аскари сафарбар этилиши кутилмоқда.
Анқара ҳукуматининг қайд этишича, АҚШ бошчилигидаги коалиция кучларининг икки йилдан буён давом этиб келаётган ҳаво ҳужумлари сабабли ўзгарган мувозанат энг кўп Туркиянинг миллий хавфсизлигига таҳдид туғдирган. Шунинг учун Анқара чегара бўйлаб амалга ошириладиган ҳарбий амалиёт жараёнида АҚШликлар билан доимий алоқада бўлади.
Туркия бош вазири Аҳмад Довутўғли Туркия ва Сурия ўртасида 900 километрга чўзилган чегаралар хавфсизлигини муҳофаза қилиш учун Туркия ҳукумати ҳар турли эҳтимолий ҳужумларга қарши тайёр эканлигини билдирди. Унга кўра, керакли барча чора тадбирлар кўриб қўйилган.
