Сўнгги вақтларда Қирғизистонда таълим вазирлиги томонидан мактабларда ягона мактаб формасини жорий этиш масаласи қизғин бахс-мунозараларга сабаб бўлмоқда. Қирғизистон таълим вазирлиги мактабга ўқувчиларни ягона формада келишини талаб қилиб, янги ўқув йилига тендерда ғолиб бўлган формани жорий этиш масаласини кўтариб чиқди ва бу мақсадда ота-оналардан мажбурий пул йиғилмоқда. Пул бермаган ўқувчилар давлат имтихонларига қўйилмаяпти. Бундан ташқари мактаб таъмири учун пул, қўриқчи учун пул… ва ҳоказо шу каби турли йиғди-йиғдилар шу даражада кўпайиб кетдики, фарзанди мактабда таълим олаётган ота-оналар наздида мактаб бамисоли пул йиғувчи хайрия фондига ўхшаб қолди.
Давлат телевидениялари орқали эса тинимсиз ёшларни Сурияга кетаётгани ҳақида айюҳаннос солинаётган бўлсада, ёшларни бу йўлга қадам қўйишига нима мажбур қилаётгани ва буни бартараф этиш учун нималар қилиш зарурлиги, муаммони ечимлари ҳақида тўхталиб ҳам ўтилмайди. Ҳуқуқ-тартибот ходимлари эса кўча-кўйда ёш йигитларни ушлаб, уяли телефонларини ноқонуний тарзда текшириб, бирор баҳона билан йигитлардан ва уларнинг оила азъоларидан йирик миқдордаги пул талаб қилиб, таҳдид ва қўрқитиш орқали пул ундиришмоқда.
Ўқув муассасаларида эса, ёшларга қандай қилиб кенгроқ илм бериш, тарихда бўлгани каби, бизнинг фарзандларимиздан яна қайта улуғ алломалар етишиб чиқиши учун нималар қилиш ҳақида бош қотириш ўрнига мактаб формаси, ремонт учун пул йиғиш ҳақида фикрлашмоқда. Хуллас ўқитувчининг вазифаси зиё тарқатиш ўрнига пул йиғиш бўлиб қолди. Расмий ҳукумат эса ёшларни радикаллашиб кетишида айбни бир “ИШИД”га, бир қараса Ҳизбга юклаб келмоқда. Ёшлар устида ишлаётган гуруҳлар эса ёшларнинг кийимга эмас, балки онгига эътибор қаратишмоқда.
Ҳукумат томонидан олиб борилаётган бундай сиёсат қандай оқибатларга олиб келиши ҳақида ҳеч ким бош қотирмай қўйди. Бу кетишда Қирғизистон келажаги формаси чиройли, аммо боши бўм-бўш амалдорлар қўлида қолади. Чунки, инсонни кийим-бош эмас, аксинча уни ўзи ҳосил қилган тушунча бошқаради.