АҚШ ҳукумати ўзбекистонлик чегарачиларга бир неча автомобиллар гуруҳини тақдим этди. Бу ҳақда “12news” Миллий хавфсизлик хизматининг Давлат чегараларини қўриқлаш қўмитаси матбуот хизмати берган маълумотларга таяниб хабар тарқатди.
Манбанинг ёзишича, техникаларни етказиб бериш Ўзбекистон ва АҚШ ўртасидаги 2001 йилда тузилган Ўзбекистон Республикаси ва АҚШ ўртасида имзоланган гиёҳванд моддалар назорати ва ҳуқуқий мезонлар бўйича ҳукуматлараро келишув доирасида амалга оширилмоқда.
“2015 йилнинг 29 июнида Америка томони “MAN TGM 13.280 русумли 20 дона автомобилни Ўзбекистон МХХ чегара қўшинлари фойдаланиши учун тақдим этди”, — дея аниқлик киритди матбуот хизмати.
Туркистон:
Мустамлакачи давлатлар назарида “учинчи олам давлатлари” ҳисобланувчи мамлакатларнинг, хусусан исломий юртларнинг майда ишларигача аралашиб улар ўртасида бирлик ва ҳамфикрлик пайдо бўлмаслик йўлида ўз имкониятларидаги барча воситаларни ишга солиб келишмоқда.
Улар исломий юртлар халқларини ўз ақидаси, тарихи, адабиёти ва қонуншунослигидан буткул узиб ташлаш мақсадида ўқув дастурларигача, ижтимоий ҳаёти ва ўзаро алоқаларигача аралашиб, ўзлари томонидан тузиб берилган дастурдан қилча ҳам четга чиқиб кетмасликларини кучли назорат қилиб келишади. Шулардан бири Марказий Осиёда яшаб келаётган дини бир, тили бир ва урф-одат анъанлари бир-бирига яқин бўлган бир Уммат вакилларини ўртасидаги жарликни янада кучайтириш, улар ўртасига тортилган сунъий чегараларни янада мустахкамлаш учун улкан маблағ ва техникаларни ажратиб келишмоқда. Ўз хожаларин рози қилишдан бошқа ташвиши бўлмаган “мустақил давлатлар” раҳбарлари эса улар томонидан ажратилган ёрдамларни олиш орқали ўз халқлари елкасига улкан қарз юкларини илишаётгани билан сира ҳам ишлари йўқ.
Қирғизистон Россия етакчилигидаги Евроосиё иқтисодий иттифоқига аъзо бўлиб кириши арафасида Қирғизистон қўшни давлатлар билан чегараларини мустахкамлаш учун рус ҳукумати 200 миллион доллар ажратди. Гарчи бу маблағ қирғиз халқи бўйнига қарз бўлиб илинган бўлсада, рус ҳукумати бу маблағларни сарфлашни қирғиз ҳамкасбларига ишонмай ўзларига қарашли компанияга ўтказиб берди.
“Мустақил республикалар” раҳбарлари ҳам ўзаро келишаолмай қолган нуқталарида бир-бирларидан қасос олишни энг осон йўли чегараларни ёпиб қўйиш йўлини тутишади. Қуда-анда, қавму-қариндош бўлиб кетган, бозори ва мозори бир бўлган икки қардош халқларни алоқа воситалари бўлиб турган ўғринча йўлларда ҳам назоратни ҳаддан зиёд кучайтириб юборишади, бунинг натижасида эса оддий халқ озор чекиб келмоқда холос. Каримов ва Атамбаев ўртасида 8 май куни ғалаба байрами арафасида Москвада тортишиб қолишлари ортидан ўзбек-қирғиз чегарасида назорат кучайтирилиб, оддий фуқароларни ўққа тутилиши бунинг натижасида бир киши халок бўлиб яна бир киши оғир ярадор бўлиши бежизга содир бўлмади.
Мустамлакчи давлатлар ўз нуфузи остидаги республикаларга чегараларни мустахкамлаш учун қанчалик кўп маблағ ва ёрдам ажратганлари сари чегараларда низолар ва оддий фуқароларни қурбон бўлиши шунчалик кўпаймоқда.
28 июн куни кечқурун ўзбек чегарачилари Сирдарёда қайиқда сузиб келаётган балиқчиларни ўққа тутдилар. Оқибатда Қозоғистон фуқароси Уалихан Ахметов олинган яралардан қайиқнинг ўзида жон берди, иккинчи балиқчи ўзини сувга ташлаб, қозоқ соҳилига сузиб бора олгани боис жони омон қолди.
Яна бир тўқнашув Ўзбекистон-Қирғизистон чегарасида содир бўлди: Қирғизистон Давлат чегара хизматининг Жамоатчилик ва ОАВ билан алоқалар бўлими маълумотига кўра, 29 июн куни икки мамлакат чегарачи нарядлари ўртасида отишма содир бўлган.
“Айдаркент чегара отряди “Кара Шоро” чегара заставаси масъул бўлган участкада, “Машаланг” чегара назорати пости атрофида Қирғизистон чегарачилар наряди давлат чегараси чизиғида турган ўзбекистонлик чегарачиларга танбеҳ берган. Қирғизистонлик чегарачиларнинг давлат чегарасини бузмаслик ва давлат чегараси чизиғидан нарида туриб патруллик қилиш зарурлиги тўғрисидаги талабига жавобан ўзбек чегарачилари наряди қирғиз ҳарбий хизматчиларига қарата ўт очган. Икки республика чегарачилари нарядлари ўртасидаги отишма чегаранинг белгиланмаган участкасида содир бўлди”, – дейилади Давлат чегар хизмати пресс-релизида. Қирғизистон томонида жабрланганлар йўқ, Ўзбекистон томонидан бу ҳақда маълумотлар берилмаган. Бироқ “Азаттык” (Озодлик радиоси қирғиз тили хизмати) Қирғизистон ҳукуматининг Боткен вилояти бўйича мухтор вакилига таяниб хабар беришича, ўзбек чегарачиларидан бири отишма давомида яраланган.
