БМТнинг Сурия масаласи бўйича хос вакили Стеффан де Мистура Сурия ҳукуматининг даъватига жавобан Дамашққа жўнаб кетди. Хабарда айтилишича, де Мистура Италиядан Байрутга етиб бориши билан тўғри Дамашққа йўл олган.
Мистура Дамашққа етиб бориши билан Сурия ташқи ишлар вазири Валид Муаллим билаш учрашди. Муаллим Сурия инқирозини сиёсий йўллар билан ҳал қилишда Мистуранинг ташаббусини қўллаб, Уни Сурияга таклиф қилган эди. Сурия ташқи ишлар вазирининг таъкидлашича, Москва учрашувида эришилган келишувлар муҳим аҳамиятга эга ва Женева 3 конференциясининг муваффақияти учун уни амалга ошириш зарурдир.
Суриянинг “Сано” ахборот агентлиги хабар қилишича, де Мистура учрашув чоғида Сурия инқирозини сиёсий йўллар билан ҳал қилиш борасида Женевада бўлиб ўтган охирги келишувларни тақдим қилган.
Ҳукуматга яқин бўлган “ал-Ватан” газетасининг ёзишича, Мистуранинг зиёрати уч кун давом этади. Сурия ҳукуматининг раҳбари Башар Асад билан учрашув ўтказиши ҳам унинг режалари орасидан ўрин олган.
БМТ хос вакилининг сўзчиси Жесси Шахин Мистуранинг зиёрати ҳақида расмий баёнот берди. Унинг маълум қилишича, Мистура Сурия расмийлари билан учрашиб, уларни 2015 йил 5 майда бошланган ва июл ойида яна давом этадиган Женева келишувларига рози қилишга ҳаракат қилади.
“Де Мистура муаммони куч билан ҳал қилиш мумкин эмаслигига Сурия масъулларини қаноатлантиришга бел боғлаган”, “Сурия ҳукумати расмийлари билан тинч фуқароларни ҳимоя қилиш масаласи ҳам муҳокама қилинади”, дейилади баёнотда.
Мистура ўзининг аввалги ташаббуси муваффақиятсизликка учрагандан сўнг “Женева битимларини ижро қилиш” ташаббусини кўтариб чиқмоқда. Маълумки, Мистура бундан аввал “Жангларни музлатиш ва тинч аҳолига инсонпарварлик ёрдамларини етказиб бериш” ташаббусини олға суриб чиққан эди. У Асадга қарши курашаётган ва Исломдан бошқасини қабул қилмаётган жиҳодий ҳаракатларга зарба бериб, мавжуд жараённи Америка фойдасига буриш учун шу режани ишлаб чиққан эди. Бироқ унинг чиройли сўзлар билан ўралган бу ташаббуси оғиздалигича қолиб кетаверди.