Сурия ҳукумати беш йилдан буён давом этиб келаётган инқирозга сиёсий ечим топиш учун Москвада ўтказилган музокараларнинг янги бир турини ўтказиши истагида эканлигини билдирди. Суриянинг Россиядаги элчиси Риад Ҳаддод “Новости” ахборот агентлигига берган интервьюсида Суриядаги мухолиф гуруҳлар Остонада ўтказган учрашувлардан ижобий натижа кутилмаётганлигини айтиб ўтди. Ҳаддодга кўра, уларнинг бу учрашувлари ҳам аввал Истамбул ва Мисрда ўтказилган учрашувларидан ҳеч қандай фарқ қилмайди.
Остонада ўтказилган учрашув фақат мухолиф гуруҳлар ўртасида ўтказилганлигини ва бу музокараларда жуда кўп гуруҳлардан вакиллар иштирок этмаганлигини айтиб ўтган Ҳаддод Москвада яна бир бор учрашув ўтказиш учун ҳаракат бўлаётганини билдирди.
“Москвада учинчи бор йиғилиш ташкил қила олишимиз учун ҳаракат олиб бормоқдамиз. Зеро бу гал учрашувлар давлатимиз учун фойдали бўлишига ишонамиз”, деди Ҳаддод.
Сурия элчиси Москва учрашувининг учунчи турини кечиктирмай, тезроқ амалга ошириш истагида эканликларини ҳам қўшимча қилди. Сурия ҳукумати ва мухолифат вакиллари январ ва апрел ойларида Москвада икки марта музокара столига ўтиришган ва тарафлар 10 моддали ҳужжат устида муҳокама олиб боришган эди. Бироқ Женевада бўлгани каби Москва учрашувларидан ҳам бирор натижага эришилгани қайд этилмаган.
