НАТО бош котиби Жон Столтенберг Россиянинг Қримда ядровий қурол жойлаштириш эҳтимолидан ўта хавотирда эканликларини очиқлади. Столтенбергнинг таъкидлашича, НАТО Украинанинг мустақиллигини, ҳудудий яхлитлигини ва ташқи кучлардан мустақил равишда ўз келажагини ўзи белгилашини ҳимоя қилади.
“Россиянинг тажовузкор ҳаракатларини қаттиқ танқид қиламиз ва уни халқаро нормаларга амал қилишга чақирамиз. Қримнинг босиб олиниши ноқонунийдир. Биз уни тан олмадик ва бундан кейин ҳам тан олмаймиз”, деди НАТО бош котиби.
Столтенберг Россия ҳарбийларини Қораденгизга жойлаштирилиши минтақа барқарорлигига таъсир қилишини қайд этди. Минск битими Украина шарқидаги келишмовчиликлар ечими учун энг афзал йўл эканлигини билдирган Столтенберг “Ўт очишни тўхтатиш” битими жуда кўп маротаба бузилганлигига ва Россиянинг айирмачиларга бераётган ёрдами давом этаётганлигига урғу берди. Унга кўра, Россия айирмачиларни дастаклашни бас қилиши ва Украинадаги ҳарбий кучларини ортга қайтариб, сиёсий ечимни қўллаб қувватлаши лозим.
Киевда жойлашган НАТО офесидаги ходимлар сони кўпайтирилганлигини айтиб ўтган Столтенберг бу ходимлар Украина ҳукуматига, хусусан Украина мудофаа вазирига маслаҳат бериб туришини маълум қилди. Унинг очиқлашича, баҳор охирида НАТО бошчилигида амалга ошириладиган ҳарбий машғулотга Украина мезбонлик қилади. АҚШ, Канада ва Англия Украина аскарларини ҳарбий машғулотдан ўтказади. НАТОга аъзо баъзи давлатлар Украинага ҳарбий анжомлар билан ёрдам кўрсатади.
Ўз навбатида Россия ҳам НАТОнинг Украинадаги фаолиятларига қарши қадамлар ташламоқда. Россиянинг НАТОдаги вакили Александр Гришко Россия НАТОнинг режасини эътиборга олган ҳолда Қримдаги вужудини кучайтиришини билдирди.
Гришконинг билдиришича, НАТО ўлкалари охирги пайтларда Россия чегараларига яқин минтақаларда ҳарбий имкониятларини кучайтиришга ҳаракат қилмоқда. Рус дипломатларидан бири “Русиял явм” телеканалига берган интервьюсида Грешконинг сўзларини тасдиқлади.
“Сифат жиҳатида кўп ҳам ўзгариш бўлмаслиги мумкин. Аммо НАТО Шарқий Европада, яъни бизнинг чегараларимизга яқин минтақаларда таъсирини кучайтиришга ҳаракат қилар экан, биз ҳам Қиримдаги ҳарбий вужудимизни кучайтирамиз. НАТО буни қиляпти ва албатта қаршисида Россияни кўради. Бундан ташқари биз узоқ вақтдан буён Қримдаги флотимизни янлигаш ниятидамиз. Бугунгача Украина бизга бу борада қаршилик қилиб келди, энди эса буни амалга ошириш вақти етди”, деди дипломат.
