Араб Давлатлари Лигасига аъзо давлатларнинг ҳарбий бош қўмондонлари Қоҳирада йиғилиш ўтказди. Йиғилишда Лигага аъзо давлатлар ўртасида “Бирлашган Араб кучлари”ни ташкил қилиш масаласи асосий мавзу сифатида муҳокамага қўйилди.
Араб давлатлари Лигасининг раҳбари Набил Арабий Лига доираси ичида муштарак бир куч ташкил қилиш истаги борлигини билдирди. Бўлиб ўтган учрашувда минтақавий инқирозлар ва терроризмга (Исломга) қарши кураш борасида ҳамкорликда фаолият олиб бориш мавзулари ҳам кўриб чиқилди.
Ал-Арабий йиғилишда бу ташкилот узоқ вақтдан буён ўз таъсирини йўқотганлигини ва буни қайта тиклаш учун Араб давлатлари ўртасида муштарак қуролли куч ташкил қилиш лозимлигини таъкидлади. Лига бош котиби 65 йилдан буён шундай бир куч ташкил қилиш ҳақида айтиб келинаётганлигини тилга олар экан, бундан буён амалга ўтиш лозимлигини қайд этди.
Ўтган ойда Миср пойтахти Қоҳирада ташкил қилинган йиғилишда Араб давлатлари Лигасига аъзо давлатларнинг ташқи ишлар вазирлари иштирок этган эди. Мазкур йиғилишда минтақа хавфсизлигига таҳдид туғдираётган куролли (жиҳодий) гуруҳларга қарши кураша оладиган “Бирлашган араб кучлари”ни ташкил қилиш қарори тасдиқланган эди. Бу галги йиғилишда ҳам айнан шу масала асосий мавзу сифатида муҳокама қилинди ва сўздан амалга ўтишга чақириқлар бўлди.
