Саудия Арабистони Қироллигининг бош муфтиси шайх Абдулазиз бин Абдуллоҳ Саудия пойтахти ар-Риёзда жойлашган “Турки бин Абдулазиз” масжидида қилган жума хутбасида янги авлод ўз дини ва ватани учун кучли қалқон бўлиши лозимлигини таъкидлади.
Саудия Арабистонида буюк олимлар иттифоқининг раҳбарлиги вазифасини ҳам бажариб келаётган бош муфти бунинг учун мамлакат бўйлаб барча навқирон ёшларни мажбурий ҳарбий хизматга чақирилишини талаб қилди.
“Биз хавфсизлик ичида яшаяпмиз. Бу эса бошқалар ҳасад қиладиган буюк бир неъматдир. Бу неъмат учун шукр қилишимиз ҳамда динимизни ва ватанимизни ҳимоя қила олиши учун ёшларимизни мажбурий ҳарбий хизмат воситаси билан кучайтиришимиз лозим”, деди Бош муфти жума хутбаси асносида.
Бироқ бош муфтий динга ва мамлакатга қайси тарафдан ҳужум кутилаётгани ва уларни кимдан ҳимоя қилиш лозимлиги ҳақида тўхталмади.
Шайх Абдулазиз бин Абдуллоҳ ёшларнинг ахлоқини ва иймонини бузишга ҳамда ватан бирлигини парчалашга ҳаракат қилаётган душманларга нисбатан эътиборсиз бўлмасликни талаб қилиб, “Айни пайтдаги барча курашларимиз ёшларимизни ҳарбий ва фикрий тарбия соҳасида тайёрлашдан иборат бўлиши лозим…”, деди.
Бош муфтий ўзининг сўзларини қўллаб қувватлаш учун Аллоҳ Субҳанаҳу ва Таолонинг
يَاأَيُّهَا الَّذِينَ آمَنُوا خُذُوا حِذْرَكُمْ فَانفِرُوا ثُبَاتٍ أَوْ انفِرُوا جَمِيعًا
Эй мўминлар, душмандан эҳтиёт чораларингизни кўриб, жангга гуруҳларга бўлиниб ёки ҳаммангиз тўпланиб чиқинглар”, деган ояти каримасини илова қилди.
