10 апрел куни Тошкент шаҳрида бўлиб ўтган Шанхай ҳамкорлик ташкилотига аъзо давлат махсус хизматлари ва ҳуқуқ тизимлари раҳбарлари “Исломий давлат” гуруҳига қарши курашни мувофиқлаштириш йўл-йўриқларини муҳокама қилишга киришди. Минтақавий аксилтеррор тузилмаси шунингдек интернетдан террор мақсадларида фойдаланишни тўхтатиш бўйича қўшма машғулотлар ўтказиш режасини ҳам кўриб чиқади.
Шанхай ҳамкорлик ташкилоти қошидаги Минтақавий аксилтеррор тузилмаси расмийсининг матбуотга билдиришича¸ Тошкент йиғини кун тартибига террорчилик¸ айирмачилик ва экстремизмга қарши курашнинг 2016-2018 йилларга мўлжалланган дастури лойиҳаси¸ ШҲТнинг экстремизмга қарши кураш концепцияси лойиҳасини ишлаб чиқиш ва “Исломий давлат” гуруҳи таҳдидига қарши биргаликдаги чора-тадбирлари муҳокамаси киритилган.
Шунингдек, Шанхай ҳамкорлик ташкилотининг минтақавий аксилтеррор тузилмаси кенгашининг Тошкентда бўлиб ўтган йиғилишида иштирок этган Россия Федерал хавфсизлик хизмати директори ўринбосари, армия генерали Сергей Смирнов Россия ва Ўзбекистон Ҳизб ут-Таҳрир фаолиятига қарши курашиш учун ҳамкорликни йўлга қўйишини маълум қилди.
“Ҳамкорлик бир неча йилдан буён давом этмоқда. Доимий фаолият юритадиган ишчи гуруҳ ташкил этилган”, – деган Смирнов ўз баёнотида.
Туркистон:
2001 йили Хитой ва Россия бошчилигида ташкил этилган Шанхай ҳамкорлик ташкилоти (ШҲТ) ўз фаолиятининг дастлабки кунидан бошлаб асосий эътиборини Ислом ва мусулмонларга қарши курашга қаратди. Ўзининг бу разил мақсадини оқлаш учун бу курашга экстремизм ва терроризмга қарши кураш ниқобини кийдирди.
2003 йилнинг 28-29 март кунлари Москва шаҳрида бўлиб ўтган навбатдаги саммитда қароргоҳи Тошкент шаҳрида жойлашган Минтақавий аксилтеррор тузилмаси ташкил этилган эди. Мазкур саммитда ҳам иштирокчиларнинг асосий эътибори Ҳизб ут-Таҳрирга қаратилган бўлиб, унинг фаолиятини ёйилишига йўл қймаслик учун бир қатор ҳужжатлар имзоланган, шундан сўнг аввал Россия, кейинчалик Қозоғистон ва Қирғизистон Олий судлари мамлакат ҳудудида Ҳизб ут-Таҳрир фаолиятини тақиқлаш тўғрисида қарор чиқарган эди.
Ўзбекистон ҳукумати Коллектив хавфсизлик шартномаси ташкилоти (КХШТ)дан фарқли равишда ШҲТда ўз фаолиятини тўхтатмай давом эттириб келмоқда. Бунга асосий сабаб Ислом дини ёйилишини ҳар қандай кўринишларига қарши бўлган Каримов учун бу ташкилотга аъзо бўлиш унга аъзо бўлган давлатлар Россия, Қозоғистон ва Қирғизистон ҳудудида ўзбек махсус хизматларини бемалол изғиб юришига ва Каримов режими учун исталмаган шахс бўлган ҳар қандай кишини таъқиб қилиш ва ҳар қандай қонунларни бузган ҳолда бемалол ўғирлаб келишига имкониятини яратиб бермоқда.
Сўнгги йилларда Россия ҳудудидан Ўзбекистон фуқаролари, хусусан ўз ватанида тўқима айбловлар билан қидирувга берилган мусулмонларни қўлга олиниши ва тўсатдан ғойиб бўлиб қолиши, кейинчалик уларнинг дараги ўзбек махсус хизматлари ертўласи ёки бирорта тергов ҳибсхонасидан чиқиши одатий ҳол бўлиб қолди. Бу ишларнинг барчаси ШҲТ бераётган имкониятлар ортидан содир бўлмоқда.
