Қирғизистон республикаси Миллий хавфсизлик давлат қўмитасининг “Вечерний Бишкек” ахборот агентлигига хабар қилишича, АҚШ фуқароси қўлга олинган ва у берган кўрсатмалар асосида “Бир дунё Қирғизистон” офисида тинтув ишлари олиб борилди.
Маълум қилинишича, 25 март куни АҚШ фуқароси Умар Фарруҳ Ўш шаҳрида милиция томонидан ҳужжатларни текшириш учун тўхтатилганидан сўнг қамоққа олинган. Уни текшириш мобайнида ёнидан Ҳизб ут-Таҳрирнинг яқинда қўлга олинган етакчиси ва бошқа террористик гуруҳ аъзоларига қарши қўзғатилган жиноий ишлар нусхалари, диний-экстремистик ва террористик мазмундаги DVD дисклар топилган. Ҳуқуқни мухофаза қилувчи органлар томонидан аниқланишича, Умар Фаррух тегишли акредитацияси бўлмай туриб Ўш вилояти ҳудудида диний вазият тўғрисида маълумот йиғиш билан шуғулланган.
Диний экспертиза натижасига асосан Ўш шаҳри ва Ўш вилояти бўйича МХДҚ томонидан АҚШ фуқаросига нисбатан Қирғизистон жиноят кодексининг бир нечта моддалари бўйича жиноят иши қўзғатилган. Тергов давомида Умар Фаррух ўз ёнидан топилган жиноят иши нусхаларини “Бир дунё Қирғизистон” нодавлат қилувчи ташкилоти юристи Валериан Вахитовдан олганлигини айтган. Шунингдек унинг ёнидан шу ташкилот менеджери Хусанбой Солиевга тегишли ташриф қоғози ҳам топилгани хабар қилинган эди.
Шу сабабли ҳам Ўш шаҳар суди 27 март куни Вахитов ва Солиевнинг иш жойи ва хонадонида тинтув ўтказиш тўғрисида санкция берган эди. Хабар қилинишича, тинтув мобайнида уларнинг уйи ва иш жойидан диний мазмундаги брошюралар, варақа, флеш карта ва DVD дисклар топилган.
Шу билан бирга 48 соатга ҳибсга олинган АҚШ фуқароси Умар Фаррух 29 март куни ўзининг Твиттердаги саҳифаси орқали, унга нисбатан жиноят иши қўзғатилмагани ва айни вақтда “уйига кетаётгани”ни хабар қилган.
Айрим хабарларга кўра, Умар Фаррух Ўш шаҳар суди ҳукмига асосан мамлакатдан чиқариб юборилган.
