“CA-NEWS” нашрининг хабар қилишича, Қирғизистон президенти Аламзбек Атамбаев Россия президенти Владимир Путин билан учрашишдан олдин Молдова пойтахти Кишинёвга борган. Қарийб тўрт соат давом этган ташрифнинг мақсади ошкор этилмади.
ОАВда тарқалган хабарларга қараганда, Қирғизистон раҳбари Бишкекдан Молдова пойтахтига 15 март, якшанба куни соат ўн иккиларда чартер рейсда келган. Бу ерда Молдова Демократик партияси раисининг биринчи ўринбосари Влад Плахотнюк билан учрашган. Шундан сўнг Санкт-Петербургга йўл олган.
Президент аппарати ташқи сиёсат бўлимининг бошлиғи Сапар Исақов ҳозир Алмазбек Атамбаевнинг Молдовага норасмий ташрифини изоҳлашнинг вақти эмаслигини, аммо сафар Қирғизистонинг миллий манфаатларидан келиб чиққан ҳолда амалга оширилганини маълум қилди.
Туркистон:
Қирғизистон президенти Алмазбек Атамбаев Россия президенти Владимир Путин билан учрашиш учун Санкт-Петербургга боришдан олдин Молдова пойтахти Кишинёвга уюштирган норасмий сафари сирлигича қолмоқда.
Атабаев Молдова олигархи Влад Плахотнюкга тегишли “Нобил эйр” компаниясининг “Эмбраер легаси 650” самолёти билан боргани ва фақат Плахотнюк билан 4 соат давом этган учрашувдан сўнг, бошқа расмийлар билан учрашмай ортга қайтиши ва Путин билан учрашиши кўплаб саволларни пайдо қилмоқда.
Атамбаев Молдовага нима мақсадда борган бўлиши мумкин?
Биринчидан; 2014 йилнинг 30 ноябр куни Молдовада бўлиб ўтган парламент сайловларида Европага мойил бўлган партиялар ғолиб чиққан ва парламентда ҳукумрон коалиция тузишга маваффақ бўлишган эди. Шундан сўнг сайловларда иштирок этган, бироқ мағлубиятга учраган россияпараст партиялар сайлов натижаларини тан олмаган ва такрорий сайлов ўтказилишини талаб қилиб чиқишган. Бу партиялар Россия бошчилигида ташкил этилган ва 2015 йилнинг биринчи январидан амал қила бошлаган Евроосиё иқтисодий иттифоқига қўшилиш тарафдори бўлиб ҳисобланишар эди. Агар мана шу жиҳат ҳисобга олинадиган бўлса, Атамбаев Молдовага Путин топшириғига биноан ўртамчилик вазифасини бажариш учун борган бўлиши эҳтимоли бор. Худди Назарбоев Украина масаласида воситачи вазифасини бажаргани каби.
Иккинчидан; Айрим хабарларга кўра, Молдова олигархи Плахотнюкни Қирғизистонда тоғ-кон ва қирғиз паспортини тайёрлаб беришда манфаатлари бор. Бундай сирли учрашувлар аввалги президентлар Акаев ва Бакиев ҳукумронлиги даврида ҳам кўп бора ташкиллаштирилган бўлиб, буни ортидан Қирғизистон катта зарар кўргани маълум. Березовский, Бирштейн, Левитин ва бошқа олигархларнинг Қирғизистонга уюштирган сирли ташрифлар бунга мисол бўла олади.
