Миср президенти Абдулфаттоҳ ас-Сиси минтақада қуролли гуруҳларнинг таҳликаси кучайиб бораётганига эътиборни жалб қилар экан, уларга қарши бирлашган ҳарбий қувватга эҳтиёж туғилганлигини ва бу эҳтиёж кун сайин ортиб бораётганлигини таъкидлади.
Давлат телевиденияси орқали мурожаат қилган ас-Сиси бошқа давлатларга ҳужум қилиш ёки бостириб кириш каби қадамлар Миср қуролли кучларига манфаат келтирмаслигини урғулади. Шунингдек президент Сиси лозим бўлган тақдирда бошқа араб давлатлари билан мувофиқ шаклда Мисрни ва барча минтақани ҳимоя қилишга тайёр эканлигини билдирди.
Миср президенти бирлашган араб ҳарбий қувватига бўлган эҳтиёж кун сайин ортиб бораётганини ва бу жуда ҳам зарурий ҳолатга айланганлигини олға сурди.
“Associated Press” ахборот агентлиги ўтган ноябр ойида Миср, Саудия Арабистони, Бирлашган Араб Амирликлари ва Қувайт давлатлари ҳарбий ҳамкорлик қилиш мақсадида учрашув ўтказганлиги ҳақида хабар тарқатган эди.
Ас-Сисининг қайд этишича, бир ҳафта аввал ИШИД тарафидан 21 нафар мисрликнинг бошларидан жудо қилиниб ўлдирилиши ортидан Иордания ва Бирлашган Араб Амирликлари Миср ҳукуматига дастаклар таклиф қилган. 21 нафар мисрлик қатл этилгандан сўнг Миср ҳарбий самалётлари Дарна шаҳрида ИШИДга оид деб қаралган мавзеларни ҳаводан ҳужумга тутди. Аммо ҳаво ҳужумларидан фақат тинч фуқаролар, жумладан ёш болалар ҳам ҳалок бўлганлиги айтилмоқда.
