Ўзбекистон Республикаси президенти Ислом Каримов 12 январ куни Олий Мажлис Қонунчилик палатасининг биринчи ташкилий йиғилишида қатнашди ва нутқ сўзлади. Ўз нутқи давомида Каримов Ўзбекистон Евроосиё иттифоқи ёки Божхона иттифоқига қўшилмаслигини айтиб ўтди.
“Айни вақтда бир қанча давлатларда эски даврларга, собиқ совет тузуми шатоитларига қайтиш учун ишлар олиб борилмоқда. Баъзи хориж телеканалларида собиқ тузумни мақтовчи кўрсатувлар берилмоқда. Лекин биз бундай қилмаймиз. Бизнинг ўз ривожланиш йўлимиз, халқимиз олдидаги масъулиятимиз бор. Шуни аниқ айтаманки, Ўзбекистон Евроосиё Иттифоқига ёки Божхона Иттифоқига қўшилмайди”, – деди Ўзбекистон президенти Ислом Каримов.
Бундан ташқари Каримов Ўзбекистон ҳарбий блокларга аъзо бўлмаслигини ҳам айтиб ўтди.
“Мен яна бир бор қайтариб ўтаманки, Ўзбекистон ҳеч қандай ҳарбий-сиёсий блокка аъзо бўлиб кирмайди. Ўзбекистонда бошқа давлат аскарлари ҳаракат қилмайди. Ўз навбатида ўзбек аскарлари бошқа юрт тупроғида қурол кўтариб юрмайди”, – дейди Ўзбекистон Президенти Ислом Каримов.
Туркистон:
Ўзининг субутсиз сиёсати сабабли “сиёсий фоҳиша” лақабини олган Каримов ҳозирги кунда ҳам ўзининг эски одатини тарк этмагани аниқ, халқимизда “тарки одат, амри маҳол” деган мақол бежизга айтилмаган.
Гарчи Каримов ҳозирча бирор-бир иттифоқ ёки блокка аъзо бўлмаслик ҳақида оғиз кўпиртириб гапираётган бўлсада, эртага дўппи тор келиб қолган вақтда ўз сўзидан ҳеч иккиланмай воз кечиши аниқ.
СССР парчаланиш арафасида “Россиясиз кун кўриб бўлмаслиги”ни айтиб мустақиллика эришиш учун ҳеч қандай иш қилмаган Каримов Советлар давлати парчаланиб кетганидан сўнг “мустақиллик” учун “жон куйдирган”асосий курашчилардан бирига айланди.
1992 йили Коллектив хавфсизлик шартномаси ташкилоти (КХШТ)га асос солинган вақтда жонбозлик кўрсатган бўлса, кейинчалик АҚШ билан алоқалари яхшиланиши ортидан 1999 йилда бу ташкилотдаги аъзолигини тўхтатиб қўйди.
2005 йил 13 майда Андижонда уюштирган қирғини сабабли АҚШ ва Ғарб давлатлари танқидига учраган Каримов Ўзбекистондан АҚШ ҳарбий базасини хайдаб чиқариб, яна қайта ўзини Россия қучоғига отди ва Путин билан учрашиш учун Москвага учибкетиш арафасида ҳеч уялмай “Энди ким Ўзбекистонга думини кўтарса, Россияга кўтарган бўлади”, деди ва 2006 йилда КХШТга қайтиб кирди.
АҚШ Афғонистон заминида олиб бораётган босқинчилик уришлари боис Ўзбекистон билан алоқаларини қайта тиклаган ва эски адоватларни “унитгани”дан сўнг Каримов 2012 йилга келиб КХШТдаги аъзолигини тўхтатиб – чиқиб кетган эмас – қўйди ва бу орқали “узоқни кўра оладиган” Каримов қайтиш эшикларини тамоман беркитиб ташламади. Шундай экан Каримов дўппи тор келиб қолганда ёки Ўзбекистонга думини кўтарадиганлар топилиб қолган вақтда ҳар қандай иттифоқ ёки блокка ҳеч иккиланмай аъзо бўлади. Чунки Каримов учун асосий масала ўз хавфсизлиги ва режимининг барқарорлигидир. Асло Ўзбекистон халқ олдидаги масълияти эмас.
