Тожикистонда президент Эмомали Раҳмоновнинг шахсини улуғловчи янги қонун қабул қилинди. Янги қонунга кўра, Тожикистон президентининг ҳайкали давлат муассасалари ва барча давлат идораларидаги иш столи устида туриши мужбурий қилиб белгиланди.
Президент Раҳмоновнинг ҳайкали доимо давлат идораларидаги иш столи устида туриш фикри Тожикистон рассомлар бирлашмаси ва Адабиёт фонди тарафидан олға сурилди. Бунинг ортидан президент ҳайкалининг намунаси Хитойга юборилиб, турли шаклда ишлаб чиқариш учун буюртма берилди.
Ўттиз сантиметр катталигида бўлган Рохионовнинг ҳайкали бундан буёғига барча давлат ташкилотлари ва идоралари иш столи устида қад ростлаб туради.
Ҳокимиятни қўлга киритган пайтда ўзини оддий халқнинг бир вакили сифатида танитган Эмомали Рахмонов вақт ўтиши билан ўз тахтини мустаҳкамлаш мақсадида тожиклар орасидаги энг олий табақадаги оилалардан эканлигини даъво қила бошлади. Рахмоновнинг яқинлари ва ҳамтовоқларидан иборат давлат масъуллари эса президентга “Жаноби Олийлари”, деб мурожаат қилишади.
Ўрта Осиё диктаторларидан яна бири Туркманистоннинг собиқ президенти Сапармурот Ниёзов ҳам куракда турмас қарорлар қабул қилиш ва шахсга сиғиниш аломатларини рўёбга чиқариш билан ном чиқарган эди.