Қирғизистон президенти Алмазбек Атамбаев Жамоатчилик телерадиокорпорациясига берган интервьюсида, “Халқаро ҳамжамият эндиликда Қирғизистонни қашшоқ давлат деб ҳисобламаслигини”, – маълум қилди.
“Кўпчилик, шу жумладан ОАВлари ҳам бу хабарга жиддий эътибор қаратишмади, аммо Жаҳон банки ва бошқа халқаро ташкилотлар таснифи бўйича бизнинг мамлакат 2014 йилдан бошлаб қашшоқ давлатлар қаторидан чиқди ва ўртача даромадга эга ривожланаётган мамлакатлар сафига ўтди”, – деди Атамбаев.
Суҳбат давомида Атамбаев яна бир бор динни давлат ишларига аралашишига йўл қўйиб бўлмаслигини ва диний соҳада давлат назоратини кучайтириш зарурлигини таъкидлаб, шу билан бирга президент, мамлакатдаги асосий муаммолардан бири бўлган коррупцияга қарши курашни кучайтириш муҳумлигини белгилаб ўтди.
Туркистон:
Президент Атамбаев Қирғизистон қашшоқ давлатлар сафидан чиқиб, ривожланаётган давлатлар қаторига ўтганини маъмнуният билан қайд этиб ўтган бўлсада, бироқ бу ривожланиш нимани ҳисобига бўлаётганига тўхталиб ўтмади.
Қирғизистон молия вазири Ольга Лаврованинг 19 ноябр куни берган маълумотида мамлакат ташқи қарзи хавфли кўрсаткичга етиб, Ялпи ички маҳсулот (ЯИМ)нинг 60 фоизига яқинлаб қолгани ва бу кўрсаткич пулга чақилганда 3 миллиард 400 миллион доллардан ошишини айтиб ўтилган эди.
Ольга Лаврова берган маълумотларга кўра, Қирғизистон Хитойдан 1 миллиард 42 миллион доллар, Россиядан 300 миллион доллар, Япониядан 253 миллион доллар, Германия ва Туркиянинг ҳар биридан 100 миллион доллар қарздор. Бундан ташқари Қирғизистонга Жаҳон банки 700 миллион доллар, Осиё банки 600 миллион доллар, Халқаро валюта жамғармаси 200 миллион доллар қарз берган.
Бунга қўшимча Қирғизистон яна Қозоғистондан 100 миллион доллар ва яқинда ташкил этилган қирғиз-рус тараққиёт жамғармаси орқали Россиядан 500 миллион доллар қарз олишни режалаштирмоқда. Аммо ҳукуматни ташқи қарз масаласи заррача ҳам ташвишлантираётгани йўқ.
Бугунги кунда ҳукуматнинг бирдан-бир ташвиши қандай қилиб бўлса ҳам Уммат ичида Исломни ёйилишига йўл қўймаслик ва Божхона иттифоқига аъзо бўлгунга қадар Россия босими остида исломий кўриниш ва қадриятларини жамиятдан имкон қадар узоқлаштиришдан иборат бўлиб турипти. Шунинг учун ҳам Атамбаев қачон ва қаерда гапиришидан қатъий назар суҳбатнинг асосий мавзуси Ислом дини ва ҳукуматни дин соҳасидаги сиёсатини кучайтириш бўлиб қолмоқда.
