Қирғизистон президенти Алмазбек Атамбаев 2 декабр куни расмий ташриф билан Саудия Арабистони Қироллигига келди.
Алмазбек Атамбаев ташриф доирасида Саудия Арабистони раҳбарияти билан музокаралар ўтказади. Учрашувларда икки давлат ўртасида сиёсий, савдо-иқтисодий ва маданий-гуманитар соҳалардаги ҳамкорликни ривожлантириш масалалари муҳокама этилади.
Қирғизистон президентининг Арабистон ярим оролидаги сафари 8-декабрга қадар давом этиши режалаштирилган. Бу кунлар мобайнида у Саудия Арабистони қироллиги, Бирлашган Араб Амирликлари ҳамда Қатар раҳбарлари билан учрашиб, ўзаро сиёсий, савдо-иқтисодий ва маданий-гуманитар соҳаларидаги алоқалар бўйича муҳокамалар ўтказади. Ташрифдан мақсад Қирғизистоннинг ушбу давлатлар билан муҳим соҳалардаги ҳамкорликларини мустаҳкамлашдан иборат.
Мазкур сафарда президент Атамбаевга Ташқи ишлар вазири Эрлан Абдилдаев, президент аппаратининг ташқи сиёсат бўлими бошлиғи Сапар Исаков, Қирғизистонни Саудия Арабистонидаги элчиси Абдулатиф Жумабоев, Қувайтдаги элчиси Жусупбек Шарипов, Миллий банк раиси Тўлқунбек Абдигулов, президент аппарати бошлиғининг биринчи ўринбосари Икромжон Имилянов, дин ишлари бўйича давлат комиссияси директори Ўрозбек Молдалиев ва Қирғизистон мусулмонлари муфтийси Мақсатбек Тўктомушевлар ҳамроҳлик қилишмоқда.
