Украина президенти Пётр Порошенко Киев ҳукумати мамлакат шарқидаги инқирозни ривожлантириш учун амалга оширилаётган турли сценарийларни ўрганиб чиқаётганлигини эълон қилди. Унинг ишора қилишича, Украина Россияга қарши “кенг қамровли уруш” сценарийсига тайёргарлик кўрмоқда.
“Мен Россия кучлари билан жанг қилишдан қўрқмайман. Биз кенг қамровли уруш сценарийсига тайёрмиз. Армиямизнинг ҳозирги аҳволи беш ой аввалги аҳволидан анча яхшироқдир. Ҳозирда бизни бутун олам қўллаб қувватлаб турипти. Аскарларимиз мамлакатимизни ҳимоя қилишга қодир эканлигини кўрсатишмоқда. Биз фақат тинчликни истаймиз. Лекин афсуски, ёмон сценарийларни ўрганиб чиқишимиз керак бўлади.”, деди Порошенко Германиянинг “Bild” газетасига берган интервьюсида.
Президент Порошенко Украина тинчлик битимига эришиш учун қўлидан келган барча ишни қилганлигини қўшимча қилар экан, Киев ҳукумати келишувга тайёр эканлигини ва инқирозни ҳарбий йўл билан ҳал қилиш мумкин эмаслигига ишонишини эслатиб ўтди.
“Биз урушни хоҳламаймиз, тинчликни хоҳлаймиз. Европа қадриятлари учун курашяпмиз. Аммо Россия битимларга риоя қилмаяпти”, деди Украина президенти.
Пётр Порошенко газетага берган интервьюси давомида Украина НАТОга қўшилиш учун ҳануз тайёр эмаслигини таъкидлаб ўтди.
“Биз ўлкамизда барча стандартларга мос келадиган ислоҳотларни амалга оширмоғимиз лозим. Шундан сўнг халқимиздан НАТОга қўшилишни хоҳлаш ёки хоҳламасликлари ҳақида сўрай оламиз”, деди Порошенко.
Президент Порошенко НАТОнинг ўзи ҳам Украинани ўз сафига қўшиб олишга тайёр эмаслигига эътиборни тортди. Лекин У Украинанинг Европа иттифоқига қўшилиш эҳтимоли борлигига урғу берди.
Хабарларга кўра, Украина шарқида тарафлар ўртасида жанглар тўхтамаяпти. Украина ахборот-таҳлил марказининг сўзчиси Андрей Лисенко мамлакат шарқидаги Никишино шаҳри яқинида юзага келган қуролли тўқнашувда 23 нафар россияпараст айирмачи ўлдирилганлигини, 27 нафари эса жароҳат олганлигини очиқлади. Ҳукумат кучларидан ҳам 6 аскар ҳалок бўлган, 9 нафари жароҳат олган.
Айирмачилар 24 соат ичида 39 маротаба ўт очишни тўхтатиш қарорига хилоф иш қилганлигини қайд этган Лисенко айирмачиларнинг икки марта Донецк ҳаво майдонига ҳужум уюштирганини ва бир марта ҳукумат кучларига тузоқ қўйганини билдирди.
