Қирғизистоннинг иккинчи президенти Бакиевни ҳокимиятдан ағдарилишига олиб келган 2009-2010 йил куз-қиш ойларидаги энергетика бўҳрони Атамбоевни эҳтиёт бўлишга, имкони борича ўз ўтимишдоши йўл қўйган хатоларга йўл қўймасликка ундамоқда. Шунинг учун ҳам Қозоғистондан кела солиб, Туркманистонга икки кунлик сафар билан жўнаб кетди. 11 ноябр куни Қирғизистон президенти Алмазбек Атамбаев Ашхабод шаҳрида Туркманистон президенти билан турли соҳаларда икки томонлама ҳамкорликни ривожлантириш бўйича музокаралар ўтказди.
Атамбаев айниқса энергетика-иқтисод соҳасидаги ҳамкорликнинг аҳамиятига эътибор қаратди. “Умид қиламанки, Туркманистоннинг энергетика салоҳиятини инобатга олган ҳолда, ҳамкорлигимиз минтақа учун намунага айланади”, – деди у.
Ўз навбатида Гурбангули Бердимуҳамедов Қирғизистонни Туркманистон учун ишончли ҳамкор деб атади. “Бизнинг олдимизда иқтисодий, савдо-инвестициявий, илмий-маданий ва гуманитар соҳалардаги алоқаларни ривожлантириш вазифаси турибди”, – деди Туркманистон президенти.
Шунингдек, Гурбангули Бердимуҳамедов Туркманистон электр энергияси ишлаб чиқаришни орттираётганини ва яқин орада электр энергиясини Қирғизистонга етказиш масаласини кўриб чиқишга тайёрлигини билдирди.
Бердимуҳамедов билан учрашувидан сўнг журналистлар олдида чиқиш қилган Алмазбек Атамбоев, Туркманистон Қирғизистонга 700 миллион кВт-соат электр энергияси етказиб беришга тайёр эканлигини хабар қилди.
“Келажакда, бир йилдан сўнг бир миллиард кВт-соат ва ундан ҳам кўпроқ электр етказиб беради. Албатта, биз Ўзбекистон орқали транзит масаласини хал этишимиз керак бўлади. Ўйлайманки, эртами ёки кеч бу масала ҳам хал бўлади. Келажакда, агар бизда муаммолар, энергетика бўҳрони бўладиган бўлса доимо суянишимиз мумкин бўлган қардош халқ борлигини доимо хис қилиб турамиз”, – дея белгилаб ўтди Атамбоев. Бундан ташқари Атамбоев, Қирғизистон Туркманистондан электр, нефт, табиий газ, дизел ва бензин экспорт қилиш имкониятларини топишга ҳаракат қилишини таъкидлаб ўтди.
