АҚШ мудофаа вазири Чак Ҳейгел ИШИДга қарши тузилган коалиция кучларининг ҳужумлари Асад режимига фойда келтирганлигини тан олди. Ҳайгел Пентагонда ташкил қилинган матбуот анжуманида журналистларнинг саволига жавоб берди.
АҚШ ва у тузган коалция Сурияга уюштирган ҳужумлар борасида Асад режимининг позицияси ҳақида берилган саволга “Ҳа, албатта Асад бундан баъзи ютуқларни қўлга киритади. Аммо бу ерда, дунёнинг бу қисмида барқарорлик ва хавфсизлик ўрнатиш учун лозим бўлган узоқ муддатли стротегия устида гап кетмоқда”, деб жавоб берди у.
Журналистлардан бирининг “Сурия сиёсати борасида бироз ташвишга тушаётганингиз очиқ кўриниб турипти. АҚШ Асадга яна ҳам кўпроқ босим ўтказиши учун дипломатик ёки иктисодий жиҳатдан агрессив сиёсат олиб бориш ҳақида бош қотиряптими?”, деган саволига жавоб берган Ҳейгел бу борада турли вариантлар кўриб чиқилаётганини ҳамда бу чалкаш ва узоқ давом этадиган муаммо эканлигини қайд этди.
“АҚШнинг Сурия режимига нисбатан душманона кайфиятда бўлиш ёки бўлмаслиги ҳақидаги саволингизга келсак, бу борада барча вариантларни кўриб чиқяпмиз. Шу сабабли жуда кўп баҳс мунозаралар олиб боряпмиз. Бу масалани ҳал қилиш учун Ўрта Шарқда бир коалиция ташкил қилишда давом этмоқдамиз”, деди Ҳейгел.
“Нью-Йорк таймс” газетасининг ёзишича, Чак Ҳейгел Обаманинг миллий хавфсизлик маслаҳатчиси Сюзан Райсга икки саҳифадан иборат кескин танқидий мактуб йўллаган. Ҳейгел мактубда Сурия сиёсати таназзулга юз тутиш таҳликасига дуч келишидан огоҳлантиргани айтилади хабарда.
Европа матбуоти ҳам АҚШнинг Ўрта Шарқда олиб бораётган сиёсатини ўзгартираётгани ҳақида ёзмоқда. Мавзуга доир хабар тарқатган Германиянинг “Frankfurter Allgemeine Zeitung” газетаси АҚШ бундан буён Сурия мухолифатига ёрдам бермаслиги ҳақида ёзди.
“Америка бундан буён Суриядаги жангчиларга ёрдам бермайди. Энди Асадга қарши жангларда уларни дастакламайди. Мақсад Асад режимини қулатиш эмас. Бу режа ёпилди”, дея ёзди газета.
Газетанинг ёзишича, Саудия Арабистонидан ҳам бундан буён Сурия озод армиясини дастакламаслиги талаб қилинган. Акс ҳолда минтақада катта жанг юзага келиши ва бу Исроилни ҳам ўз домига тортиши мумкин. Шахсан Барак Обама тарафидан тайинланган Жон Аллен ҳам бу фикрларни тасдиқлади.
“Энди бу ерда ҳарбий ечим имконсиз эканлиги кўриниб қолди. Бизнинг мақсадимиз ҳам мухолифатни кучайтириб Шомни қутқариш эмас. Мақсад Озод Сурия армияси вакилларини Асад билан биргаликда ўтказиладиган учрашувларга юбора олишдир. Аслида мақсадимиз Асадни ҳокимиятдан қулатиш эмас”, деди Аллен.
