Қирғизистонда машхур бўлган Ўмурбек Бабанов асос солган “Республика” ва Қамчибек Ташиев бошчилигидаги “Ата Журт” партиялари бирлашиши натижасида янги “Республика-Ата Журт” партияси вужудга келди.
20 октябр куни Бишкекдаги опера ва балет театрида янги ташкил этилган ва “Республика- Ата Журт” номини олган партиянинг таъсис қурултойи (съезд) бўлиб ўтди.
Парламентдаги “Республика” фракцияси етакчиси Мақсат Собиров, “икки партиянинг бирлашишига асосий сабаб, мамлакатни шимол ва жанубга бўлишга йўл қўймаслик. “Ата Журт” – жанубий партия, “Республика” – шимолий. Биз одамларни, халқни бирлаштиришни хоҳлаймиз”, -деди ва иккинчи сабаб қилиб, “ўтган сафар (парламентга) сайловларда 29 партия ўз намзодини илгари сурганлигини, улардан фақат бештасигина ўтганлиги”ни айтиб ўтди.
Бундан хулоса қилиш мумкинки, “Республика” ва “Ата Журт” бирлашиб, 2015 йилда бўлиб ўтадиган парламент сайловларига тайёргарлик кўришмоқда, чунки йирик партияларда депутатлик мандатларини кўпроқ қўлга киритиш имконияти юқори бўлади.
