Эрон ва АҚШ ўртасида савдо-саноат палатаси ташкил қилиниши эълон қилинди. “Меҳр” ахборот агентлигининг хабар қилишича, бу ҳақида халқаро Эрон савдо-саноат палатаси қўмитасининг бош котиби Муҳаммад Ҳусайн Беҳкиш баёнот берган.
Баёнотда айтилишича, гарчи Исроил бунга қаттиқ қаршилик қилган бўлса ҳам икки давлат орасидаги тижорий алоқаларни мустаҳкамлаш мақсадида Эрон билан Америка ўртасида муштарак савдо-саноат палатаси ташкил қилинади.
“Ўтган йили президент Ҳасан Руҳоний Нью-Йоркдаги БМТ йиғилишида иштирок этиб Эронга қайтгандан сўнг Эрон-АҚШ ўртасидаги муштарак савдо-саноат палатасининг ташкил қилинишига қатъий қарор берилди ва ўз фаолиятини бошлади. Бу фаолият асносида АҚШ ҳайъати қулайликлар билан таъминлар экан, Исроил йўлимизни тўсишга ҳаракат қилди. Аммо Эрон ҳайъатининг қаттиқ сай-ҳаракати туфайли савдо-саноат палатаси ташкил қилиш келишувига эришилди”, дейилади Ҳусайн Беҳкиш берган баёнотда.
Эрон божхонаси чиқарган ҳисоботда айтилишича охирги беш ойлик маълумотга кўра, АҚШга қилинган экспорт ҳажми 207 минг долларни ташкл қилган бўлса, импорт ҳажми 50 миллион 500 минг долларни ташкил қилган.
