Европа бозорида ўз таъсирини кучайтириш истагида бўлган Хитой ҳукумати Греция порти орқали Хитой маҳсулотларини Европага олиб чиқиш мақсадида иш олиб бормоқда. Айни мақсадда Хитой бош вазири Ли Кэцян Европанинг кириш эшиги сифатида кўриладиган Грецияга сафар қилди ва бу борада Хитой билан Греция ўртасида янги битимлар имзоланди.
Биринчи марта Грецияга сафар қилаётган Хитой бош вазири Ли Кэцян Греция бош вазири Антонис Самарас билан учрашди. Учрашув ортидан ташкил қилинган матбуот анжуманида сўзлаган Самарас “Грецияликлар мамлакатимизда хитойлик дўстимизни меҳмон қилишдан бахтиёрдир”, деди.
Учрашув пайтида халқаро бир қанча масалаларда музокара олиб боришга имкон топилганлигини қайд этган Самарас Греция янгидан ривожланиб бошлаганлигини маълум қилди.
“Мен ўз номимдан Грециянинг молиявий инқирози деб номланган охирги йилларда Хитойнинг бизга берган дастаги учун чуқур ҳурматимни изҳор этдим. Греция ишончини янгидан қозониш даврига етди. Турғунлик даврини ортда қолдириб бозорларга қайтди. Бугунга келиб Греция дунёда ва Европада ўзига лойиқ ўринни эгаллаш сари интилмоқда”, дея сўзида давом этди Греция бош вазири.
Самарас учрашувда икки ўлка ўртасида стротегик ҳамкорлик ҳақида ҳам келишиб олинганлигини тилга олар экан, Хитой бош вазири Грециянинг геостротегик жиҳатини юқори баҳолаганлигини қайд этди.
Икки вазир Грециянинг Пирей шаҳри портининг темир йўл тармоғига боғланиш маросимига иштирок этишди. Бу темир йўли Европа билан узоқ шарқ орасида марказ вазифасини ўтайди. Пирей портига етказилган Хитой моллари Греция темир йўллари орқали Европага етказилади.
Журналистлар тарафидан берилган саволларга жавоб берган Самарас “Дўстлик, ҳамкорлик, икки томонлама алоқа – бу Хитойни Европага олиб чиқиш ва Хитой учун эшик вазифасини ўташдир”, дея таъкидлади.
Хитой бош вазири Ли эса имзоланган битимлар ҳақида қисқача гапириб, Хитой давлати Грецияга доимий сармоя ётқизишга тайёр эканлигини урғулади.
