Президент Барак Обама Американинг “CBS” телевизион канали билан ўтказган суҳбатда Ироқ ва Шом Ислом давлати (ИШИД) Сурияда куч тўплашга имкон топа олганлигини айтиб ўтди.
“Ироқ ва Шом Ислом давлати (ИШИД) қурол аслаҳаларни жамлаш, моддий ресурсларни қўлга киритиш ва ҳукмронлигини кенгайтиришда Сурия ҳукуматидаги бўшлиқдан унумли фойдаланди”, деди АҚШ президенти.
Мухбирнинг “агар Вошингтон Суриядаги мўътадил (демократияни ёқловчи) мухолиф кучларни дастаклашга қарор қилганда эди бу бўшлиқ мавжуд бўлармиди?” деган саволига Обама “Сурияда Асад режимини қулатишга қодир мўътадил (демократияни ёқловчи) мухолифат мавжуд деган фикр мутлақо нотўғридир. Шунга кўра, ҳар қандай ҳолатда ҳам бўшлиқ мавжуд бўлиб қолаверади”, деб жавоб берди.
Обама Суриядаги мўътадил (демократияни ёқловчи) мухолифат билан бирга фаолият олиб боришда АҚШ ҳукумати жуда кўп вақтни беҳуда ўтказганлигини тан олди. Унинг таъбирига кўра, Башар режимини йўқ қилишга қодир бундай мўътадил (демократияни ёқловчи) мухолиф кучларнинг Сурияда мавжудлиги воқеси бўлмаган хом ҳаёлдан (фантазиядан) бошқа нарса эмас.
Президент Обама “NPR” радиосига берган интервьюсида ҳам мўътадил мухолифат Сурияда катта жамоага айлангунига қадар жуда кўп вақт керак бўлишини билдирган эди.