Ақш президенти Барак Обама Афғонистондаги иттифоқ кучларини зиёрат қилиш учун кутилмаган ташриф билан Афғонистонга келди. Зиёрат ҳақида аввалдан хеч кимга хабар қилинмаган ҳолда, Обама тунги соатларда Афғонистон пойтахтида жойлашган Баграм ҳаво базасига келиб қўнган.
У ерда нутқ сўзлаган Обама бу зиёратдан кўзланган мақсад АҚШ ҳарбийларининг йил охиригача Афғонистонни тарк этиш муддати ичида қиладиган ишлари ҳақида баҳс юритиш эканлигини билдирди.
АҚШ президенти Афғонистондаги юқори мартабали ҳарбий маслаҳатчилар билан учрашиб, АҚШ ҳарбийларини ортга қайтариш устида маслаҳатлашиш кўзда тутилган бир неча соатлик зиёрати чоғида Афғон президенти Ҳомит карзай билан учрашув режаси бўлмаганлиги айтилмоқда. Бироқ ВВС қирғиз хизматининг хабар қилишича, Афғонистон президенти Ҳомит карзай Обама билан кўришишдан бош тортган. Хабарга кўра, АҚШ элчилиги Карзайни Обама билан учрашиш учун Баграм ҳаво базасига чақирган, аммо Афғон лидерининг администрацияси бу даъватни қабул қилмаган. Исмини ошкор қилмаган АҚШ расмийсининг Франс Пресс ахборот агентилигига айтишича, Карзайнинг бу жавоби АҚШ учун кутилмаган бир ҳолатдир.
Шунингдек, Карзай АҚШ билан хавфсизлик ҳақидаги шартномани имзолашдан бош тортиб келяпти.Афғонистон президенти лавозимига даъвогар номзодлар эса Қўшма Штатлар билан бундай шартномани имзолашга тайёрлигини билдирган. Июн ойида Афғонистон президентлиги сайловининг якуний босқичи бўлиб ўтади.
АҚШ президенти Сайловда ким ғолиб бўлишидан қатъи назар Кобул билан яқиндан ҳамкорлик қилиш ва хавфсизлик ҳақида икки томонлама шартнома имзолашга умид қилаётганини таъкидлади. Президентлигини якунлаётган Ҳамид Карзай билан имзоланмаган хавфсизлик келишуви янги раҳбар томонидан қайта кўриб чиқилиши мумкин. Муроса учун ҳамон имконият бор, дейди АҚШ расмийлари. Ҳужжат имзоланган тақдирда АҚШ Афғонистон тупроқларига бир неча юз ҳарбийларини қолдириши мумкин.
