Ва алайкум ассалом ва раҳматуллоҳи ва барокатуҳ.
Ернинг айлана шаклдалигини ақлан билиш қийин эмас, фақат шу соҳани ўрганиш керак. Буни ўрганиш вожиб, чунки Аллоҳ Таоло «Оли Имрон» сурасида дейди:
إِنَّ فِي خَلْقِ السَّمَاوَاتِ وَالأَرْضِ وَاخْتِلاَفِ اللَّيْلِ وَالنَّهَارِ لآيَاتٍ لأُولِي الأَلْبَابِ
„Осмонлар ва Ернинг яралишида ҳамда кеча ва кундузнинг алмашиб туришида ақл эгалари учун (бир яратувчи ва бошқариб тургувчи зот мавжуд эканлигига) оят-аломатлар борлиги шубҳасиздир“. [3:190]
Ёки «Бақара» сурасида: – „Албатта, осмонлар ва Ернинг яратилишида, кеча ва кундузнинг алмашиб туришида, денгизда одамларга керакли нарсаларни олиб юрган кемаларнинг (сузишида) ва Аллоҳ осмондан туширган ва у сабабли ўлик ерни тирилтириб, бор жонзотни тарқатиб-ёйиб юборган сув деган неъматда ва шамолларнинг йўналтирилишида, осмон ва Ер орасидаги итоатгўй булутда - (булутларнинг ҳаммасида) ақлли кишилар учун оят-аломатлар бордир“ [2:164].
Астраномия каби илмларга алоқадор бундай нарсаларни шу соҳани мутаҳассисларидан тушунтириб беришларини сўраш керак. Аллоҳ Таоло айтади:
فَاسْأَلُوا أَهْلَ الذِّكْرِ إِنْ كُنْتُمْ لاَ تَعْلَمُونَ
– „Агар билмасангиз, зикр аҳлларидан сўранглар“. [16:43]
Бу барчага қаратилган умумий оятдир.
Расулуллоҳ(с.а.в) боши жароҳатланган киши ҳақидаги воқеада айтган эдиларки: «Агар билмасалар, сўрамайдиларми?! Ахир ожизликнинг давоси сўрашлик-ку!» дедилар.
Қуйдаги оятлардаги “Ернинг қандай ёйиб-текислаб қўйилганига...” каби оятлар Ернинг думалоқ эканига зид эмас, балки думалоқ Ерда инсоннинг яшаши учун қулайликлар мукаммал эканига назар ташлаш билан Аллоҳ Таолонинг нақадар ҳикмат эгаси экани ҳақида тафаккур қилишга ундаш бўлмоқда.
«Ғошия» сурасида:– „Ахир, улар туянинг қандай яратилганига; осмоннинг қандай кўтариб қўйилганига; тоғларнинг қандай тикланганига ва Ернинг қандай ёйиб-текислаб қўйилганига (ибрат назари билан) боқмайдиларми?“ [88:17-20]
Муттақий.
|
Муаллиф
Ер шари думалокми ёки текисликми?
