10 июн куни Италияда бўлиб ўтадиган Катта Еттилик саммити олдидан Италиянинг “Corriere della Sera” газетасига интервью берган Россия президенти Владимир Путин рус армиясининг Натога ҳужум қилиши ҳақидаги фикрларни ахмоқлик дея баҳолади. Ҳарбий майдондаги тайёргарликлар Россияга қаратилган таҳдидларга қарши ҳимоя мақсадида амалга оширилаётганини билдирган Путин айрим давлатлар ҳарбий, иқтисодий, молиявий ёрдамларни қўлга киритиш илинжида бундай ташвиқотларни илгари сураётганини даъво қилди.
“Россия ва Ғарб давлатлари ўртасида алоқалар қарама қаршилик устида эмас, ҳамкорлик устида қўрилмоғи лозим. Ғарбда Россиянинг Нато ўлкаларига ҳужум қилишига доир фикрлар мавжуд. Россия ва Натога аъзо давлатлар ўртасида уруш бўлиши ҳақида фақат эсини йўқотган одамгина фикр юритиши мумкин”, деди президент Путин.
“Дунё шунчалик ўзгариб кетганки, бундай ҳарбий можарони ҳатто тасаввур қилиш қийин. Россиядан қўрқишга ҳожат йўқ”, дея қўшимча қилди у.
Россия президентининг таъкидлашича, АҚШ Атлантик минтақаси етакчилигини давом эттириш мақсадида ҳаракат олиб бормоқда. Шу боис Россия билан Европа Иттифоқининг бир бирига яқинлашишига қарши чиқиб, Россиядан “олабўжи” сифатида фойдаланмоқда.
“АҚШ Атлантик минтақасидаги режаларини рўёбга чиқариш учун ташқи таҳдидларга эҳтиёжи бор. Демакки, Эрон етарли даражада қўрқинчли бўлмай қолган. Энди ким билан қўрқитади? Украина инқирози қаердан келиб чиқди? Киевдаги қаршиликлар Марказий разведка бьюроси (ЦРУ) тарафидан бошқарилди. Биз фақат бўлган ҳодисаларга қаршилик қилишга мажбур бўлиб қолдик”, деди Владимир Путин.
Айни пайтда Натога аъзо бўлган шарқий Европо давлатлари ҳарбий тайёргарликни кучайтираётгани айтилмоқда.
Бундан бир ҳафта аввал НАТО бош котиби Йенс Столтенберг Россия билан ҳамкорлик қилишга тайёр эканлигини билдириб, “Россия танлаш ҳуқуқига эга. Ёки кураш йўлини давом эттириб яна ҳам кўпроқ қамалда қолади ёки ҳамкорлик йўлини танлайди. Агар ҳамкорлик қилишни танласа бу Россия учун ҳам НАТО учун ҳам фойдали бўлади. Биз ҳамкорлик қилишга тайёрмиз”, деб айтган эди.
