Тожикистонда Исломий либосларга қарши кураш давом этмоқда
Тожикистон ҳукумати мамлакат ичида аёлларнинг қандай кийиниши ҳақида “Тавсиялар” номли китоб нашр қилди. Тожикистон маданият вазирлиги томонидан нашр қилинган китобда 7 ёшдан 70 ёшгача бўлган тожик аёлларига мос либослар тақдим этилади.
“Осиё-Плус” интернет сайтида тарқатилган хабарга кўра, иш жойларда, миллий ва расмий байрамларда, тўйларда, ҳатто дам олиш кунларида тожик аёлларининг қандай кийим кийиши ҳақида ушбу китобда тавсиялар мавжуд.
Китобда шунингдек, “тожик аёллари нимани киймаслиги лозим” номли боб учун ҳам кенг ўрин ажратилган. Исломий кийимлар, қора либослар, муслималарнинг ҳижоблари ва румоллари тавсия этилмайдиган кийимлар орасида кўрсатилган. Тожик жамиятида Исломий либос саналмиш румол ва ҳижоб кенг тарқалган бўлса-да, давлат президенти Эмомали Раҳмон Исломий кийимларни қаттиқ танқид қилиб келади.
Собиқ Совет Иттифоқи таркибида бўлган Тожикистонда, аҳолининг катта қисми мусулмон бўлиб, Исломий ҳукмларга амал қилишда маҳкам турадиган халқлардан биридир. Шундай бўлишига қарамай ҳукумат Исломий асосдан келиб чиққан тожик маданиятини “миллийлик” баҳонасида Исломдан узоқлаштириш учун иш олиб бормоқда.
Мазкур китобга нисбатан ижтимоий тармоқлардан танқидлар ёғилди. Айримлар ҳукуматни, Тожикистонни Шимолий Кореяга айлантиришда айбладилар. “Маданият вазирлиги бундай бемаъни нарсаларни ўйлаб топиш ўрнига бошқа масалалар билан шуғулланса бўларди”, дейди улар.
Баъзилар эса анъанавий либосларнинг жуда қиммат баҳога сотилишидан шикоят қилиб, “Бизга бу кийимларни Маданият вазирлиги сотиб олиб берадими?”, дея тивит қолдирди.
