Путин Истамбулда Эрдоған билан учрашди
Туркия Президенти Ражаб Тоййиб Эрдоған учоқ кризисидан сўнг илк бор Туркияга сафар қилган Россия Президенти Владимир Путин билан Мабейн саройида учрашди. Икки мамлакат раҳбарлари ўз делегациялари ҳамроҳлигида бир соат қирқ дақиқа давом этган музокаралардан сўнг қўшма матбуот анжумани ташкил қилишди. Сўнги хабарларда айтилишича, анжуман чоғида икки раҳбар барча соҳаларда ўзаро ҳамкорликни ривожлантириш ҳақида келишиб олганликларини маълум қилишган.
Туркиянинг Энергия вазири Барот Албайрак ва Россия Энергетика вазири Александр Новак ўртасида “Туркия Оқими” (Россиядан бошлаб қора денгиз орқали Туркиягача ётқизиладиган қувур) лойиҳаси ҳақида битим имзоланиши ортидан баёнот берган Эрдоған Россия раҳбари билан барча соҳаларда келишиб олганлигини билдирди.
“Биз жаноб Президент билан тўлиқ бир кун бирга бўлдик. Ниҳоят, мазкур шартномаларни имзолаш нуқтасига етиб келдик ва имзолар чекилди. Келажакда мудофаа, савдо, маданият соҳалари каби, кўп соҳаларда барча муносабатларимизни ривожлантиришга келишиб олдик. Юқори даражали маслаҳат кенгаши йиғилиши борасида кўрсатмалар бердик. Шу йилнинг охирида ёки кейинги йилда шу масалалар устида музокараларимизни амалга оширамиз. Албатта, минтақадаги жуда нозик масала, Сурия масаласини ҳам батафсил муҳокама қилишга имкон топдик. Фурот қалқони борасида қандай ҳамкорлик қила олишимиз ҳақида гаплашиб олдик”, деди жумладан Туркия президенти.
Ўз навбатида президент Путин туркиялик ҳамкасби билан икки мамлакат учун жуда муҳим саналган масалалар муҳокама қилинганликларини таъкидлар экан, бундан буён Россияда мева-чевалар орзонлашишидан хурсандчилигини яширмади.
“Бугун биз Туркиядан олинган айрим қишлоқ хўжалик маҳсулотларини Россия бозорларига чиқардик. Хусусан, цитрус мевалар Россияда етиштирилмайди. Агар бу ердан экспорт қилинса Россияда бундай меваларнинг нарҳлари арзонлашади”, деди Путин.
