Матбуот баёноти
Америка ўзи ясаган бутни еб қўймоқда!
Жоҳилият даврида араблар хурмодан бут ясаб олар, қорини очиб қолса, уни еб қўяр эдилар! Бугун ҳам ўша тарих такрорланмоқда, бироқ янада мураккаб шаклда. Ғарбга кўра, фикр, виждон ва дин эркинлиги, фикр ва сўз эркинлиги, тинч намойиш қилиш эркинлиги, сиёсий фаолият олиб бориш эркинлиги, озчилик ҳуқуқини ҳимоя қилиш эркинлиги ҳамда қийноқлар ва шафқатсиз муомалаларни тақиқлаш бир пайтлар энг муқаддас қадриятлар эди… Бироқ бу қадриятлар капиталистларнинг ва ҳукмрон элитанинг манфаатларига зид келиб қолса, ўзлари муқаддас деб билган қадриятлардан воз кечиб юборишмоқда.
Айрим Европа давлатларида муслима аёлнинг мактабларда, иш жойларида ва баъзи жамоат жойларида ҳижоб кийиши тақиқланган. Ваҳоланки, кийиниш уларнинг либерал назариялари бўйича шахс эркинлигига киради. Аммо бу «эркинлик» фақат ҳукмрон сақофат ва сиёсатга хизмат қилгандагина амал қилади.
Худди шу каби очиқ қарама-қаршиликни бугун биз Қўшма Штатларда гувоҳи бўляпмиз. Дарҳақиқат, у ердаги талабалар шаҳарчасида университет талабалари намойиш қилиб, Ғазодаги геноцид ва сургунни қўллаб-қувватлаш сиёсатига норозилик сифатида ўз фикрларини билдирган пайтда, яъни Америка конституциясида кафолатланган ҳуқуқларидан фойдаланганларида Трамп маъмурияти билан унинг ортидаги молиявий ва сиёсий нуфуз соҳиблари талабаларни жинояткорликда айблашди, университетдан ҳайдаш билан, ҳатто хорижлик талабаларга депортация қўллаш билан таҳдид қилишди!
Ҳа, Ғазо ҳодисаси Ғарбнинг эркинликлар муқаддас деган даъвосининг ёлғонлигини очиб ташлади. Эркинлик капиталистик тизимда ҳукмрон элитага хизмат қилсагина қўлланадиган бир қурол эканини, аммо қачон уларнинг манфаатларига зид келиб қолса, ҳеч иккиланмасдан бу эркинликни эзиб ташлашини яна бир бор тасдиқлади.
Бутун оламга Исломни қайта ўрганиш вақти келмадими? Ислом Ғарбнинг қуруқ озодлик шиорларига ўхшамайди! Ислом инсониятни бошқа инсонларга қуллик қилишдан озод қиладиган ва шахсий манфаатлардан кўра адолатга асосланган ҳуқуқларни ўрнатувчи тузумдир. Бир куни Умар розияллоҳу анҳу одамларга хитоб қилаётганларида бир аёл уни тўғрилаб қўйди. Лекин Умар розияллоҳу анҳу халифа бўлса ҳам, аёлнинг овозини ўчирмади, гапини бўлмади. Бунинг ўрнига камтарлик билан хатосини тан олиб, бундай деди: «Умар хато қилди, аёл тўғри гапирди». Яна бир воқеада бундай дейди: «Оналари озод қилиб дунёга келтирган одамларни қачондан бери қул қилдингиз?».
Ислом инсонларга дини, жинси, ва миллатидан қатъий назар, фақат инсон бўлгани учун ҳуқуқ ва мажбуриятларни берган. Ислом ҳеч қачон эътиқодни куч билан ўрнатмаган! Аллоҳ Таоло айтади:
﴿لَآ إِكۡرَاهَ فِي ٱلدِّينِۖ قَد تَّبَيَّنَ ٱلرُّشۡدُ مِنَ ٱلۡغَيِّۚ﴾
«Динга зўрлаб (киритиш) йўқ. Зеро, ҳақ йўл залолатдан ажраб бўлган» [Бақара 256]
Ислом иймонни мажбурлашга эмас, балки ақл ва фикрга асослайди:
﴿إِنَّ فِي خَلۡقِ ٱلسَّمَٰوَٰتِ وَٱلۡأَرۡضِ وَٱخۡتِلَٰفِ ٱلَّيۡلِ وَٱلنَّهَارِ وَٱلۡفُلۡكِ ٱلَّتِي تَجۡرِي فِي ٱلۡبَحۡرِ بِمَا يَنفَعُ ٱلنَّاسَ وَمَآ أَنزَلَ ٱللَّهُ مِنَ ٱلسَّمَآءِ مِن مَّآءٖ فَأَحۡيَا بِهِ ٱلۡأَرۡضَ بَعۡدَ مَوۡتِهَا وَبَثَّ فِيهَا مِن كُلِّ دَآبَّةٖ وَتَصۡرِيفِ ٱلرِّيَٰحِ وَٱلسَّحَابِ ٱلۡمُسَخَّرِ بَيۡنَ ٱلسَّمَآءِ وَٱلۡأَرۡضِ لَأٓيَٰتٖ لِّقَوۡمٖ يَعۡقِلُونَ﴾
«Албатта осмонлар ва ернинг яратилишида, кеча ва кундузнинг алмашиб туришида, денгизда одамларга керакли нарсаларни олиб юрган кемаларнинг (сузишида) ва Аллоҳ осмондан туширган ва у сабабли ўлик ерни тирилтириб, бор жонзотни тарқатиб-ёйиб юборган сув (деган неъмат)да ва шамолларнинг йўналтирилишида, осмон ва ер орасидаги итоатгўй булутда — (буларнинг ҳаммасида) ақлли кишилар учун оят-аломатлар бор» [Бақара 164]
Ислом шариат ва қонунлар татбиқини нафс-ҳавога эмас, тақвога асослади, кучлига кучсизни ғамхўрлик билан бошқаришни буюрди. Росулуллоҳ ﷺ марҳамат қилганлар:
«أَلَا كُلُّكُمْ رَاعٍ وَكُلُّكُمْ مَسْئُولٌ عَنْ رَعِيَّتِهِ»
«Диққат, ҳар-бирингиз ғамхўр бошқарувчисиз, ҳар-бирингиз қўл остидагилардан жавобгарсиз». Аллоҳ Таолонинг қуйидаги каломига кўра, Ислом ҳақ устида туришга буюрди, гарчи ҳақ шахсий манфаат ва одамлар манфаатига зид келиб қолса ҳам:
﴿يَٰٓأَيُّهَا ٱلَّذِينَ ءَامَنُواْ كُونُواْ قَوَّٰمِينَ بِٱلۡقِسۡطِ شُهَدَآءَ لِلَّهِ وَلَوۡ عَلَىٰٓ أَنفُسِكُمۡ أَوِ ٱلۡوَٰلِدَيۡنِ وَٱلۡأَقۡرَبِينَ﴾
«Эй мўминлар, адолат билан тургувчи ҳамда ўзингнинг ёки ота-она ва қариндош-уруғингизнинг зарарига бўлса-да, Аллоҳ учун тўғри гувоҳлик бергувчи бўлинг!» [Нисо 135]
Бу билан Ислом раҳм-шафқат ва адолат билан бошқарилувчи жамиятнинг намунасига айланди.
Эй мусулмонлар! Динингизни нафақат маданий мерос, балки Аллоҳнинг шариати билан ҳукм юритувчи жамиятни бунёд этадиган кенг қамровли тизим сифатида қайта кашф этинг. Америка халқини, зиёлилар ва ҳақиқатга интилувчи барчани оммавий ахборот воситаларининг Исломни бузиб талқин қилишларига берилиб кетмасликка ҳамда идеологик хурофотлардан узоқ равишда ва ёрқин ақлга асосланган ҳолда Исломни ўрганишга чақирамиз. Исломни идеологик хурофотлардан холи тарзда ўрганиб чиқсангиз, ўзига хизмат қилмаган пайтда қадриятларни оёқ ости қиладиган тор манфаатлар ҳукмронлигидан бу дунёни қутқарувчи ягона адолатли альтернатива Ислом эканини кўрасиз! Аллоҳ Таоло бундай деди:
﴿يَٰٓأَيُّهَا ٱلَّذِينَ ءَامَنُواْ ٱسۡتَجِيبُواْ لِلَّهِ وَلِلرَّسُولِ إِذَا دَعَاكُمۡ لِمَا يُحۡيِيكُمۡ﴾
«Эй мўминлар, Аллоҳ ва Росули сизни абадий ҳаёт берадиган нарсага даъват қилар экан, уни қабул қилинглар» [Анфол 24]
Ҳизб ут-Таҳрирнинг Америкадаги
матбуот бўлими
