Баткенда 32 та масжид ва 5 та мадрасанинг фаолияти тўхтатилди
Баткенда 32 та масжид ва 5 та мадрасанинг фаолияти расман тўхтатилди. Шунингдек, 55 та масжид ва 6 та диний таълим муассасаси устидан акт тузилиб, тегишли кўрсатмалар берилди. Бу ҳақда Миллий хавфсизлик бўймча давлат қўмитаси хабар берди.
Қўмита томонидан тарқатилган маълумотда, санитария шароити ва динга эътиқод қилувчилар ўртасида радикал-экстремистик ғоянинг тарқалиши мазкур жойларнинг ёпилишига сабаб сифатида кўрсатилган.
Бундай текширувлар бошқа вилоятларда ҳам ўтказилиб, айрим масжид ва мадрасалар аллақачон ёпиб қўйилган. Аслида бу текширувлардан кўзланган асосий мақсад диний соҳада назоратни кучайтиришдир. Санитария ва ёнғин хавфсизлиги талаблари эса, қуруқ баҳонадан ўзга нарса эмас. Чунки ҳукумат чиндан ҳам ёнғин хавфсизлигини олдини олишни истаса, ишни аввало ёқилғи қуйиш шохобчаларидан бошлаши керак эди. Бугунги кунда Бишкек шаҳри ва аҳоли пунктларидаги ёқилғи қуйиш шохобчалари ва нефт омборларининг аҳоли саломатлигига таъсири ҳамда атроф-муҳит учун хавфлилиги долзарблигича қолмоқда. У ерларда ёнғин содир бўлган ҳолатлар ҳам мавжуд. Иккинчи пойтахт ҳисобланмиш Ўш шаҳридаги аҳвол ҳам худди шундай. Ўш шаҳрида вақти-вақти билан ёқилғи қуйиш шохобчаларида ёнғин келиб чиқиш ҳолатлари учраб туради. Бундан ташқари, йирик бозорлар ва дам олиш масканларида ёнғин хавфсизлиги таъминланмаганлиги сабабли йирик ёнғин ҳодисалари такрорланиб туради.
Санитария масаласига келсак, давлат тозалик ва аҳоли саломатлиги ҳақида ҳақиқатан ҳам қайғурганида, бу ишни озиқ-овқат саноатини назорат қилишдан бошлаган бўларди. Негаки, ресторанларда ҳаддан ташқари антисанитария ҳолатлари мавжудлигига қарамай, “кўриб, кўрмасликка олиш” усули давом этмоқда. Шунинг учун овқатдан заҳарланиш ҳолатлари кўп учраб туради. Бунга яққол мисол сифатида яқинда Бишкекдаги фастфуд ресторанларида содир бўлган оммавий заҳарланиш ҳолатини келтириш мумкин.
Шундай экан, “рухсат қоғози”, “ёнғин хавфсизлиги” ёки “санитария ҳолати” каби сабаблар масжид ва мадрасаларнинг ёпилиши учун шунчаки баҳонадан бошқа нарса эмас! Ҳозирги ҳукумат мухолифат етакчиларининг бир қисмини ҳибсга олиб, баъзиларига мансаб бериб, баъзилари билан келишиб олгач, энди қарши кураш навбати Исломга келган кўринади. Диний қадриятлар кенг тарқалган ҳудудларда масжид ва мадрасаларнинг ёпилиши шунга далолат қилмоқда. Шунинг учун биз Қирғизистон ҳукуматига мурожаат қилиб айтамизки, “ҳайит намозида халққа ўзингизни кўрсатиб, кейин яна масжидларни ёпиш билан мунофиқлик аломатларини намоён қилмоқдасиз! Аллоҳдан қўрқинг ва Исломга юзланинг! Аслида сизнинг вазифангиз масжид ва мадрасаларни ёпиш эмас. Аксинча, масжидлар қуриш ва у ерларда шарт-шароитлар яратиб қўйишдир! Мадрасалар очиб, мусулмон ёшларга ўз динларини ўргатишдир! Лекин, афсуски, сиз Аллоҳнинг наздида азиз бўлишни ўрнига мустамлакачиларга малайлик қилиш билан ҳорликни танламоқдасиз!
Мумтоз Мавароаннаҳрий
