بِسْمِ اللهِ الرَّحْمٰنِ الرَّحِيمِ
Шом аҳлининг Туркия чегараларида снайпердан ўққа тутилиши Шом қўзғолони устида тил бириктираётган режимнинг тизимли сиёсатидир
Устоз Носиршайх Абдулҳай
Ҳизб ут-Таҳрирнинг Сурия
вилоятидаги матбуот бўлими аъзоси
Турк режимининг Шом аҳлига қарши жиноятлари давом этмоқда. Бу илмоний режим Шом қўзғолонини бўғизлаш ва қонхўр режимни мустаҳкамлаш билан кифояланмади… Унга аёллар, болалар ва қариялар қотили, номуслар тажовузкори, ҳурматларни оёқ ости қилувчи қонхўр режим билан ярашишга чақираётгани ҳам етмади… Буларнинг барчасига қўшимча, чегарада аҳлимизни снайпердан ўққа тутиб, қонга буламоқда, шу орқали Шом тоғутининг вазифасини мукаммал бажаришга астойдил ҳаракат қилмоқда. Зеро, бу чегараларни мустамлакачи кофир аввал Ислом давлатини ағдариб, мусулмон юртларини парчалагандан сўнг бир бутун Умматни бўлиш учун ўрнатган эди. Қонхўр режимнинг бошимизга кимёвий ракеталар, порохли бочкалар ва бомбалар ёғдиргани камлик қилганидек, энди Турк режими чегара атрофида шундай жиноятларни содир этмоқда.
Дарҳақиқат, Эрдоган жандармаси снайпери 2023 йил 13 март душанба куни Харбатул Жавз қишлоғида Мустафо Файз Абу Бассом исмли сурияликни отиб ўлдирди. Кекса ёшли Мустафо ўзига қарашли далада трактори билан ер ҳайдаётган бўлган… Бу жиноятдан бир неча кун аввал эса, жандарма суриялик бир қанча болаларни ушлаб ваҳшийларча қийноққа солганди ва улардан бирини қийноқ остида ўлдирганди. Ҳолбуки, болаларнинг «айб»и тоғут Башар жиноятларидан қочиб, Аллоҳнинг юртларида ризқ топишни орзу қилгани бўлган, холос. Зеро, бу юртда Турк режими ўзининг разведкаси орқали ўзига тиз чўкиб итоат қиладиган жангчи гуруҳ етакчиларини ва вазифалантирилган солиқчи ҳукуматларни бошимизга ҳукмрон қилди… Бу ҳукуматлар солиқлар солиш билан одамлар тинкасини қуритмоқда. Иродаларини синдириш учун ва таслим бўлиш ечимларига рози қилиш учун кунлик ризқларига ва бир бурда нонларига қарши курашмоқда. Зеро, таслим бўлиш ечимларини турк режими билан унинг ортидаги Америка бир миллиондан зиёд қурбон берган бир халққа зўрлаб тиқиштиришяпти.
Бу макрдан мақсад, Американинг сиёсий ечими ва БМТнинг 2254-сонли резолюцияси орқали бизни қайта қонхўр режимнинг қушхонасига тиқишдир. Турк режимининг Россия, Эрон ва Асад режимларига тинимсиз қатнаб, улар билан ҳамкорлик учрашувларини ўтказаётганидан бирдан-бир мақсад, Америка томонидан зиммасига юкланган вазифасини охиригача адо этишдир. Бунинг учун шу кунга қадар бу режим ёлғондан «Сурия халқининг дўстлари» тўнини кийиб келди ҳамда зўрлик билан «муҳожирлар ва ансорлар» шиорини кўтариб келди… Аммо Сурия халқи бунга алданмайдилар, балки турк режимидан ҳам, унинг макр ва жиноятларидан ҳам бутунлай покдирлар, бу қилмишларидан безор бўлдилар.
Ушбу ифлос снайпер жинояти, чегаралардаги шу каби жиноятларнинг навбатдагисидир. Яъни, бу жиноят Эрдоган Туркияси режимининг Шом аҳлига қарши олиб борган нафратли ирқчилик сиёсати оқибатида юзлаб бегуноҳ инсонларнинг ҳаётига зомин бўлган жиноятларнинг давоми сифатида кўрилади. Снайпер жинояти – баъзиларнинг Эрдоганни оқлаш учун ямоқ солиб, тарғиб қилаётгани каби – «шахсий хато» эмас. Балки нафратли миллий тафаккур ва мустамлакачилик чегараларининг табиий натижасидир. Ҳолбуки, биз мусулмонлар битта давлат соясида душманларимизга қарши бир тану бир жон бўлиб жанг қилганимиздан ва Исломга нусрат бериш йўлида қонларимиз қонларимизга аралашгандан сўнг, мустамлакачи бизнинг давлатимизни ағдариб бўлиб ташлади ва орамизда шундай чегараларни пайдо қилди. Бундай сиёсатни, то мана шу мустамлакачи кофир ўрнатган чегараларни бузиб ташлаб, золим режимларни ағдариб, Ислом ҳокимияти барпо этилмагунча асло тўхтатиб бўлмайди.
Ўзларини қўзғолоннинг исломий вакиллари дея мунофиқлик билан даъво қилаётган ва турк режими билан унинг шунча жиноятларига қарамай иттифоқчи бўлган сиёсий ҳайъатлар ва кенгашларга келсак, уларнинг снайпер жиноятига нисбатан позициялари худди мурдаларнинг сукунати каби бўлди. Ораларида бу ҳақда баёнот берганлари ҳам бўлди, аммо бу баёнот эмас ялтоқлик, лаганбардорлик, ялиниш, хорланишдан бошқа нарса эмас. Ҳатто буни мазкур марҳумни устига чиқиб тепкилаш ва турк режимини оқлашга уриниш, дейиш мумкин. Чунки баёнотларида айни масалани арзимас қилиб кўрсатиб, «арконлари мустаҳкам бир режимнинг жинояти ва сиёсати эмас, балки шахсий бир хатти-ҳаракат» қилиб кўрсатишди! Ваҳоланки, бу ўнлаб йиллардан буён систематик равишда қасддан қилинаётган сиёсат бўлиб, ўзининг миллий хавфсизлигини ва ирқчилик чегараларини муқаддасламоқда, Ислом Уммати ва Шом аҳлининг қони эвазига бўлса ҳам сайловдаги муваффақиятни биринчи ўринга қўймоқда.
Масалан, турк режими думларидан бири Октай Йилмаз ахборот телеканалларидан бирида сиёсий таҳлилчи сифатида чиқиб, илмоний режимнинг миллатчилик йўналишини ва мусулмонлар қонини менсимаслигини «чегара дахлсизлигини ҳимоя қилиш», деб атаб, уни юзсизларча оқлашга уринди ва Қаззофийнинг «Сенлар кимсан ўзи?!», деган иборасини такрорлади.
Ҳалабнинг ёрдамчиси қаҳрамон Мавлуд Олтинтошни ўлдирган кимсада Шом аҳлига нусрат-ёрдам бериш ҳамда уларнинг қонлари ва қурбонликларини ҳимоя қилиш ташвиши бўлмайди. Зеро, бу шундай Ҳалабки, Эрдоган ўзининг рус дўсти билан ҳамкорлик қилиш орқали уни мағлуб этиш учун тил бириктирган шаҳардир… Зотан, буни Путиннинг ўзи эътироф этган. Эрдоганнинг ҳам бор-йўқ ташвиши, бу дарё бўлиб оқаётган қонларни ва чор атрофга сочилаётган таналарни сариқ чақага олмасдан, хўжайинларини рози қилиш ва сайловда муваффақият қозонишдан иборат.
Ҳа, турк режимининг қўзғолонимизни ҳалокат жарлиги ёқасига олиб келган бир сиёсий раҳбарият эканлиги фош бўлди… У билан бирга уни стратегик иттифоқчи, деб билувчи етакчилар ва ҳукуматларнинг ҳам шармандаси чиқди… Улар билан бирга Эрдоганга ҳамду сано айтаётган, унинг макрлари, фатналари ва жиноятларини ямаб, яшириш билан шуғулланаётган кимсалар ҳам очилди… Ҳозирда буюк Умматнинг оддий фарзандлари бу режимни ёмон кўриб қолганига ва улар дину ақида ришталари орқали азизлик ва куч-қудратга интилаётганига қарамай, ҳамон баъзи кимсалар «ватан» деган санамга сиғиниб ётишибди.
Эндиги вақт Шом аҳли учун ҳаракатга келиш вақтидир. Улар ўзларининг барча оғриқлари ва азоб-уқубатларига чек қўйиш учун жиддий фаол ҳаракатга келишлари вақти келди. Энди, тил бириктирувчилар, номардлар ва хоинлар ғуборини эгниларидан қоқиб ташламоқлари, ўз қарорини халқаро разведкага гаров қилиб берган ҳукуматлар ва жангчи гуруҳ етакчиларидан қутулмоқлари ва ўзлари учун онгли холис сиёсий етакчиликни қабул қилиб, мақсадли ва самарали равишда ақл билан иш тутмоқлари лозим. Ушбу холис онгли етакчилик уларнинг ғам-ташвишларини елкасига ортиб, улар билан биргаликда қўзғолонлари мақсадини рўёбга чиқариш учун фаолият қилмоқда. Бу етакчилик қўлида Умматнинг ақидаси тўридан балқиб чиққан халоскорлик лойиҳаси бор. У биз учун қонхўр режимни ўз инида ағдаришимиз ва унинг харобалари узра Росулуллоҳ ﷺ буюрган Халифалик тузуми соясида Ислом бошқарувини барпо этишимиз учун муфассал йўл харитасини чизиб берди. Бу, ўз навбатида, Умматнинг ростгўй фарзандларидан тартибли жамоий ҳаракат қилиб, қўзғолонлари мақсадини амалга оширишни талаб қилади.
Сўзимиз ниҳоясида Туркиядаги мусулмон аҳлимизга бундай деймиз: Анави режимдан фарқли ўлароқ, сиз биздансиз ва биз сизданмиз. Бас, қўзғолонимизга қарши душман билан тил бириктираётган ва аҳлимиз қонини ўзига ҳалол қилиб олган бундай режимни қачон тийиб қўясиз? Унинг қилмишларига наҳотки рози бўлсангиз?! Ахир, биз сизнинг дин ва ақидада қардошларингиз эмасмизми?! Сиз билан динимиз, душманимиз, Китобимиз, лойиҳамиз бир эмасми?! Давлатимиз битта эмасмиди ва уни қайта барпо этишимиз керак эмасми?! Бас, Аллоҳдан қўрқинг, Исломга ва мусулмонлар лойиҳасига нусрат-ёрдам бериш омонатини зиммангизга топширган Роббингиздан тақво қилинг. Роббимиз бу омонатни бизга динни ҳаётдан, давлатдан ва жамиятдан ажратган жинояткор илмоний бошқарувдан узоқ равишда, қайтадан одил Ислом давлати остида ҳаёт кечиришимиз учун ишониб топширган. Аллоҳ ҳаққи, динингиз, номусингиз ва қардошларингиз қонини ўйланг!
Шом аҳлига келсак, улар расмий турк раҳбариятидан ва у билан алоқа қилиб, Шом қўзғолони қарорини тортиб олганлардан ўз қарорини қайтариб олмоқлари вақти келди. Шу орқали ўз йўлларини тўғрилаб, ростгўй оға-иниларини ўзларига етакчи қилиб олиб, қонхўр режимни ағдариш ва унинг харобалари узра – Аллоҳнинг изни ила – Халифаликни барпо этишдек буюк ғояларига етишлари лозим.
Роя газетасининг 2023 йил 29 март чоршанба кунги 436-сонидан
