بِسْمِ اللهِ الرَّحْمٰنِ الرَّحِيمِ
Ислом Уммати оламни қутқаришга ҳаракат қилувчи раббоний Умматдир
Ислом келиб, ўз ақидаси билан одамларнинг ақидаларини ва ҳаёт ҳақидаги фикрларини ўзгартирди. Ўз шариати билан уларнинг ҳаётий ишларини тартиблаштирди. Исломни қабул қилганлар зулматдаги кимсаларни нурга, бандаларга ибодат қилишдан бандалар Роббисига ибодат қилишга чиқарувчи вакилларга айландилар. Бу иш Росулуллоҳ ﷺнинг тириклик чоғларида ҳам, вафотларидан кейин ҳам мусулмонларнинг одатий ишлари бўлган. Саҳобий Робеъ ибн Омир розияллоҳу анҳуга қаранг. Пайғамбар алайҳиссаломнинг мактабини аъло даражада битириб чиққанлардан бири бўлмиш бу зот одамларга Исломни жуда гўзал суратда етказар эди. Дарҳақиқат, Форс қўмондони Рустам ундан «бу ерга сизларни нима юборди?», деб сўраганда бундай деган эди: «Аллоҳ бизни ўзи хоҳлаган бандаларини бандаларга ибодат қилишдан Аллоҳ Таолога ибодат қилишга, дунё торлигидан охират кенглигига, динлар зулмидан Ислом адолатига чиқариш учун юборди. Аллоҳ яна бизни ўз халқига у зотнинг динига уларни даъват қилишимиз учун юборди. Ким қабул қилса, биз ҳам ундан қабул қиламиз ва ортга қайтамиз, уни ва ерини тарк этамиз, ерини ўзи бошқараверади. Ким бош тортса, Аллоҳнинг ваъдасига эришгунимизга қадар уришаверамиз деди». (Табарий «Русул ва мулук» китобида ривоят қилган). «Юборди» сўзидан мурод Аллоҳ Субҳанаҳу ва Таоло худди росуллари зиммасига юклаган вазифани бизнинг ҳам зиммамизга юклади, демакдир. Шунга эътибор қаратингки, бу Исломни бутун инсониятга тақдим этиш вазифасидир. Мудом ҳаётда анбиё ва расуллар қолмаган экан, демак, бу вазифа Ислом Уммати зиммасига тушган. Уммат то қиёмат кунига қадар елкасида Ислом нури ва адолатини ташиш, оламни залолатдан қутқариш, инсониятни зулм, бахтсизлик, хорлик ва қулликдан халос этиб, Ислом бошқаруви соясида кучли ва фаровон яшашга олиб чиқиш билан шуғулланади.
Роя газетасининг 2023 йил 8 март чоршанба кунги 433-сонидан
