Зилзила қурбонларининг сони 72 мингдан ортиши тахмин қилинмоқда
Туркияда юз берган зилзила масаласида Туркия вазирлар маҳкамасининг йиғилиши бўлиб ўтди. Туркия президенти Ражаб Таййиб Эрдўған йиғилишдан сўнг берган баёнотида зилзила оқибатида қурбонлар сони 35418 нафарга, жароҳатланганлар сони эса 105505 нафарга етганини жамоатчиликка маълум қилди. Туркия корхоналар ва тадбиркорлик конфедерацияси (TÜRKONFED) ҳисоботига кўра, қурбонлар сони 72 мингдан ортиши тахмин қилинмоқда.
Изоҳ: Дарҳақиқат Туркияда юзага келган зилзила ўта улкан талофатларга сабаб бўлди. Ушбу зилзилада вафот этган мўмин-мусулмонларни Аллоҳ раҳматига олсин, жароҳат олганларга тез кунларда комил шифо ато этсин.
Аммо вазиятга бошқа жиҳатдан назар ташлайдиган бўлсак, ушбу ҳолат нафақат Туркиядаги мусулмонлар, балки бутун дунё мусулмонларининг бир тану-бир жон эканлигини ва ҳар қандай ҳолатда бирлашиб кетиши мумкинлигини яна бир бор исботлади. Яъни, зилзила бўлган ҳудуддаги халқларга Туркиянинг ўзидан ва кўплаб Ислом давлатларидан ёрдам жўнатиш ҳамда вайроналар остида қолган инсонларни қуткариш учун моддий ва маънавий кучларини сарфлаган мусулмонлар буюк бирдамлик намунасини кўрсатишди. Бунга гўзал мисоллар шунчалик кўпки, уларни санаб адоғига етиб бўлмайди. Қўлида ҳеч нарса бўлмагани учун ёлғиз сигирини сотиб ёрдам жўнатган онахонлар, зилзиладан жабрланганлар совуқда қолмаслиги учун чўнтагига қўлқоп солиб, тўнларини бериб юборган отахонлар, миллионлаган долларларини бериб, изсиз ғойиб бўлган холис мусулмонлар, дўконларига қулф осиб, уйидаги ток ишлаб чиқарувчи генератор ва белкуракларини мошинасига юклаб йўлга отланган савдогарлар, вайроналар остида қолган мусулмонларни қутқариш учун ўта хавфли бўлишига қарамай, ўз жонини хатарга қўйган кўнгилли қутқарувчилар… ва ҳоказо таърифлашга тил ожиз бўлган кўплаб мисоллар келтириш мумкин. Эътбор қаратмаган ҳеч бир Исломий ўлка қолмади. Ҳатто яшашга қийналиб турган Афғонистон ва Аракандаги мусулмонлар ҳам бор йўғини тўплаб юборишга киришди.
Хуллас, бу ҳамжиҳатлик Аллоҳ Таолонинг إِنَّمَا الْمُؤْمِنُونَ إِخْوَةٌ “Мўминлар ҳеч шак-шубҳасиз оға-инилардир”, ояти ва Росулуллоҳ ﷺнинг:
«تَرَى الْمُؤْمِنِينَ فِي تَرَاحُمِهِمْ وَتَوَادِّهِمْ وَتَعَاطُفِهِمْ كَمَثَلِ الْجَسَدِ، إِذَا اشْتَكَى عُضْو تَدَاعَى لَهُ سَائِرُ جَسَدِهِ بِالسَّهَرِ وَالْحُمَّى»
“Сиз мўминларни бир–бирларига раҳм шафқат, меҳр муҳаббат ва дўстлик кўрсатишларида худди бир жасадга ўхшайдики агар унинг бир аъзоси шикоят қилса қолган аъзолар иситма ва бедорлик билан бир-бирларини унга чақираётганини кўрасиз”, деган ҳадиси шарифи Ислом Умматининг қон-қонига нақадар сингиб кетганлигини қатъий тарзда исботлади. Уларнинг қалбида бирдамлик учқуни ҳали ҳам сўнмаганлигини бутун дунёга намоён қилди.
Бошқа ҳазоратларда асло топилмайдиган ушбу бирдамлик ва ўзаро ҳамжиҳатлик Халифалик давлати қулатилган ва унинг ўрнини мустамлакачи кофирларга тобе давлатчалар эгаллаган ҳамда мусулмонлар узоқ йиллар давомида Исломдан узоқлаштирилиб, Ислом аҳкомлари ўрнига илмонийлик, демократия ҳукмлари татбиқ қилинаётган бир пайтда содир бўлмоқда. Бироқ шуни унутмаслик керакки, агар мусулмонлар битта Ҳалифалик давлатида бирлашмаса, юқоридаги бирдамлик – кўзларни қанчалар қувонтирмасин – узоқ давом этмайди. Мусулмонлар бирдамлигининг бирдан-бир кафолати уларни ягона байроқ остига бирлаштирадиган Ҳалифалик давлатидир. Шундай экан, мусулмонлар бутун Ислом Умматини бирлаштирадиган Халифалик давлатини тиклашлари ва бунинг учун ҳар бир фурсатни ғанимат билишлари лозим.
Зоҳид Заргар
